‘ოცნების’ აქტივისტებმა ჩანდურაში ჩვენს წარმომადგენელს სცემეს’ – ენმ–ს ლიდერი ახალქალაქში

შემთხვევა ახალქალაქში, სოფელ ჩანდურაში, დღეს, შვიდ ნოემბერს, დღის მეორე ნახევარში მოხდა. როგორც „სამხრეთის კარიბჭესთან“ ახალქალაქში „ნაციონალური მოძრაობის“ ოფისის ხელმძღვანელი აშოტ რაისიანი ამბობს, მის წარმომადგენელს „ოცნების“ აქტივისტები ფიზიკურად გაუსწორდნენ.

„უთხრეს რატომ ხარ აშოტას მეგობარი და რატომ უჭერ მხარს ოპოზიციასო, ამის გამო დაარტყეს, თავში აქვს ჭრილობა, ტელეფონიც დაუმტვრიეს. ახლა საავადმყოფოშია“, – გვიყვება აშოტ რაისიანი და ამატებს, რომ ამ წუთებში საავადმყოფოში დაშავებულთან „ოცნების“ წარმომადგენლები არიან შესულები და ცვდილობენ მასზე ზეგავლება მოახდინონ – „არ უნდათ, რომ ამაზე რემიკმა ილაპარაკოს და ცდილობენ გააჩუმონ“.

ახალქალაქში სალომე ზურაბიშვილის შტაბის ხელმძღვანელი და საკრებულოს თავმჯდომარე ნაირი ირიციანი დაპირისპირების ფაქტს ადასტურებს, თუმცა, პოლიტიკურ მოტივს კატეგორიულად უარყოფს: „ფეხბურთში იყო ჩემპიონატი. ერთი ქალაქის და ერთი სოფლის გუნდი მონაწილეობდა. თამაშის დასრულებამდე ხუთი წუთი იყო დარჩენილი რომ გუნდებმა ერთმანეთში რაღაცაზე კამათი დაიწყეს. აქ არაფერ შუაშია „ნაციონალური მოძრაობა“, უბრალოდ ახალგაზრდები რაღაცაზე შელაპარაკდნენ“.

დაშავებული რემიკ პოღოსიანი ამ წუთებში ახალქალაქის რეფერალურ ჰოსპიტალში იმყოფება. როგორც ექიმმა „სამხრეთის კარიბჭესთან“ სატელეფონო საუბარში განაცხადა მას ჭრილობები თავის არეში აქვს მიყენებული და რენდგენოგრაფია უტარდება: „ვიდრე გამოკველვა არ დასრულდება ვერაფერს გეტყვით. პაციენტი როცა შემოიყვანეს, მან თქვა, რომ ეზოში დაეცა“.

შინაგან საქმეთა სამინისტრომ მომხდარზე ძიება სისხლის სამართლის კოდექსის 126-ე მუხლით დაიწყო, რაც ცემას გულისხმობს: "როგორც კი შესაძლებელი იქნება დაშავებულს სამართალდამცველები გამოკითხავენ", – გვითხრეს შსს–ში.

[მარიამ ბარძიმაძე, ახალქალაქი]