2013 წლის გამოცდები დასრულდა

ერთიანი ეროვნული გამოცდები 27 ივნისს ქართული ენისა და ლიტერატურის გამოცდით დაიწყო და 17 ივლისს ფიზიკის გამოცდით დამთავრდა. 3 ივლისიდან კი პედაგოგების გამოცდები დაიწყო. 9 და 10 ივლისს საერთო სამაგისტრო გამოცდები ჩატარდა. თუმცა ახალციხის საგამოცდო ცენტრში მაგისტრანტობის მსურველები არ დარეგისტრირებულან. 15 ივლისს კი სტუდენტთა საგრანტო კონკურსი ჩატარდა.

მთელი საქართველოს მასშტაბით პროცედურული დარღვევების გამო გამოცდიდან მხოლოდ 2 აბიტურიენტი და 3 პედაგოგი მოიხსნა.

ახალციხის საგამოცდო ცენტრის ხელმძღვანელი გელა ინასარიძე ამბობს, რომ გამოცდებმა მშვიდ ვითარებაში ჩაიარა. თუმცა, გასულ წელთან შედარებით აბიტურიენტებმა წელს უფრო მეტი გაფრთხილება მიიღეს.

- "სხვა მხრივ გამოცდები ნორმალურად მიმდინარეობდა. არცერთი აბიტურიენტი, პედაგოგი და სტუდენტი გამოცდიდან არ მოხსნილა“, - ამბობს გელა ინასარიძე.

საგამოცდო პროცესის დასრულებასთან დაკავშირებით საქართველოს განათლებისა და მეცნიერების სამინისტროში გუშინ შემაჯამებელი ბრიფინგი გაიმართა. ბრიფინგზე გამოცდების ეროვნული ცენტრის ხელმძღვანელმა მაია მიმინოშვილმა განაცხადა, რომ წელს
არაქართულენოვანმა აბიტურიენტებმა გამოცდებში ქართულენოვან აბიტურიენტებთან შედარებით ცუდი შედეგი აჩვენეს. მიმინოშვილის თქმით, მომავალში ამ საკითხს სამინისტრო განსაკუთრებულ ყურადღებას მიაქცევს.

- “მინდა ხაზი გავუსვა და ამას ნამდვილად უნდა მიექცეს ყურადღება, რომ სამწუხაროდ არაქართულენოვანი აბიტურიენტების შედეგები მნიშვნელოვნად ჩამორჩება ქართულენოვანთა შედეგებს. განსაკუთრებით ჩვენი აზერბაიჯანელი აბიტურიენტების შედეგები, რომლებიც საკუთარ ენაზე აბარებდნენ ზოგად უანრებს. მათ გამოცდებზე პირველი ვარიანტი წერეს, სადაც სხვა ვარიანტებთან შედარებით ცუდი შედეგი დაფიქსირდა. ეს არის ნიშანი იმისა, რომ ჩვენ მაქსიმალური ყურადღება უნდა მივაქციოთ არაქართულენოვანებში მოსწავლეთა სწავლების პროცესს ამ პრობლემის აღმოსაფხვრელად”, – განაცხადა მაია მიმინოშვილმა.

საერთო ჯამში 2013 წლის გამოცდებისთვის 42 000-მდე აბიტურიენტი, 8 000-ზე მეტი გრანტის გაუმჯობესების მსურველი, 9 500-ზე მეტი მაგისტრანტი და 25 000 - ზე მეტი მასწავლებელი დარეგისტრირდა. აბიტურიენტთა უმეტესობამ 30 000 – მდე ახალგაზრდამ, უცხო ენად ინგლისური აირჩია. რაც შეეხება არჩევით საგნებს, ყველაზე მეტმა - 14 500-მდე აბიტურიენტმა ისტორია აირჩია. ბრაილის შრიფტით გამოცდა ოთხმა პედაგოგმა და ერთმა აბიტურიენტმა ჩააბარეს. გამოცდებში წელს 200-მდე სპეციალური საჭიროების მქონე პირი, 9 პატიმარი და 180-მდე უცხო ქვეყნის მოქალაქე მონაწილეობდა.

შეგახსენებთ, რომ 2013 წლის ერთიანი ეროვნული გამოცდებისათვის აბიტურიენტებს საშუალება აქვთ პირველადი შედეგების გამოცხადების შემდეგაც ცვალონ არჩეული უმაღლესი სასწავლებლების ჩამონათვალი, საგანმანათლებლო პროგრამები (ფაკულტეტები), მათი რაოდენობა და თანმიმდევრობა. პროცესი სააპელაციო განაცხადების მიღების დასრულებასთან ერთად შეწყდება.

[თამარ თოთაძე, ახალციხე]