დღეიდან ერთიანი ეროვნული გამოცდები დაიწყო

მთავარი → სიახლე, განათლება 03.07.2017

დღეიდან, 3 ივლისიდან, საქართველოში ერთიანი ეროვნული გამოცდები დაიწყო. საგამოცდო პროცესი ქართული ენისა და ლიტერატურის გამოცდით გაიხსნა.

დღეიდან ერთიანი ეროვნული გამოცდები დაიწყო

გამოცდების ეროვნული ცენტრის ცნობით, ერთიან ეროვნულ გამოცდებზე წელს 41 200-მდე აბიტურიენტი იყო დარეგისტრირებული, თუმცა, ნაწილი გამოაკლდა იმის გამო, რომ გამოსაშვებ გამოცდებზე ერთ-ერთ საგანში მაინც ვერ გადალახეს მინიმალური ბარიერი. საბოლოოდ, გამოცდებში დაახლოებით 39 000-მდე აბიტურიენტი მონაწილეობს.

ცენტრის განცხადებით, აბიტურიენტი საგამოცდო ცენტრში საგამოცდო ბარათზე მითითებულ დროსა და მისამართზე უნდა გამოცხადდეს . მან თან უნდა იქონიოს საგამოცდო ბარათი და პირადობის დამადასტურებელი მოწმობა.

რეგისტრაციის დაწყებიდან ერთ საათში იკეტება საგამოცდო ცენტრის შენობა და აბიტურიენტი გამოცდაზე აღარ დაიშვება.

2017 წლის ერთიანი ეროვნული გამოცდები 27 ივლისს დასრულდება. გამოცდების ნაწილი ორ, ნაწილი კი ერთ სესიად ჩატარდება.

გამოცდების განრიგი ასეთია:

3-4 ივლისი (პირველი და მეორე სესია) - ქართული ენა და ლიტერატურა;
6-7 ივლისი (პირველი და მეორე სესია) - ზოგადი უნარები;
10-11 ივლისი (პირველი და მეორე სესია) - ინგლისური ენა;
10-ივლისი (პირველი სესია) 11-ივლისი (მეორე სესია) - რუსული ენა;
10 ივლისი (მეორე სესია) - ფრანგული ენა;
11 ივლისი (პირველი სესია) - გერმანული ენა;
12 ივლისი (პირველი და მეორე სესია) - გეოგრაფია;
13 ივლისი (მეორე სესია) - მათემატიკა;
14 ივლისი (მეორე სესია) - ლიტერატურა;
17 ივლისი (პირველი და მეორე სესია) - ისტორია;
18 ივლისი (მეორე სესია) - ბილოგია;
19 ივლისი (მეორე სესია) - ქიმია;
25 ივლისი (პირველი სესია) - სამოქალაქო განათლება;
26 ივლისი (პირველი სესია) - ფიზიკა;
26 ივლისი (პირველი სესია) - სახვითი და გამოყენებითი ხელოვნება;
27 ივლისი (პირველი სესია) სტუდენტთა საგრანტო კონკურსი.

2017 წლის ერთიანი ეროვნული გამოცდებისთვის საგამოცდო ცენტრები გახსნილია საქართველოს ყველა ქალაქში, გარდა ოკუპირებული ტერიტორიებისა. მთელი საქართველოს მასშტაბით 22 საგამოცდო ცენტრია, – თბილისში ათი საგამოცდო ცენტრია გახსნილი, ქუთაისში - სამი, ხოლო დანარჩენ ქალაქებში თითო საგამოცდო ცენტრი იფუნქციონირებს. საგამოცდო ცენტრი გახსნილია ახალცხეშიც.

[sknews.ge]