ენზელ მკოიანი: ‘ჩხუბში მონაწილეობა მე არ მიმიღია, იქ ჩემი ძმა და შვილი იყვნენ’

„ეს იყო ჩვეულებრივი პროვოკაცია! ჯერ „ნაციონალები“ მივიდნენ ჩემი ძმის „კალონკებთან“ და ზურაბიშვილის პლაკატები ჩამოხიეს, თან იგინებოდნენ, ვინც ამას ხმას მისცეს იმათი დედაო. ჩხუბში მონაწილეობა მე არ მიმიღია, იქ იყო ჩემი ძმა და შვილი. უბრალოდ მათ უნდოდათ, აშოტ რაისიანისთვის ეკითხათ, რატომ გააკეთა ეს მან. ამ მიზნით მივიდნენ მის ოფისთან. აშოტამ კი უთხრა, მე გავკეთეო და თან ყვიროდა. ამის მერე დაიწყო ჩხუბი“, – ჰყვება ენზელ მკოიანი „სამხრეთის კარიბჭესთან“ სატელეფონო საუბარში.

მისი თქმით, მიუხედავად ახლა ახალქალაქში არსებული დაძაბული ვითარებისა, წინასაარჩევნო პერიოდი მეორე ტურამდე იქნება ძალიან მშვიდი: „ამის მერე იმაზე უფრო მეტ პროცენტს ავიღებთ ვიდრე აქამდე ავიღეთ“.

შეგახსენებთ, რომ ენმ–ს ოფისზე თავდასხმა დღეს, 30 ოქტომბერს, დაახლოებით, 13:00 საათზე მოხდა. ენმ–ს რაიონული ორგანიზაციის ხელმძღვანელი აშოტ რაისიანი ამბობს, რომ მას და მის თანაგუნდელებს თავს, ახალქალაქსა და ნინოწმინდაში "ოცნების" დეპუტატის ენზელ მკოიანის ძმა და "ოცნების აქტივისტები დაესხნენ. შემთხვევის შედეგად ოთხი ადამიანი დაშავდა და ოთხივე მათგანი ახალქალაქის ცენტრალურ საავადმყოფოში გადაიყვანეს. ოთხივე მათგანი კატასტროფის ჯგუფმა თბილისში ტრავმატოლოგიურ კლინიკაში გადაიყვანა.

შინაგან საქმეთა სამინისტრო მომხდარს სსკი–ის 239 მუხლის მეორე და მესამე ნაწილით იძიებს. რაც გულისხმობს წინასწარი შეთანხმებით ჯგუფის მიერ ჩადენილ ხულიგნობას, რა დროსაც გამოყენებული იყო ცეცხლსასროლი იარაღი, ან იარაღად სხვა საგანი.

[sknews.ge]