ახალქალაქში ენმ–ს ოფისთან ენზელ მკოიანის ძმის პირადობა იპოვეს [Video]

ახალქალაქში, დღეს, 30 ოქტომბერს, ენმ–ს ოფისთან, თავდასხმის ადგილზე, ადგილობრივმა გრიგორ ბარცეღიანმა საფულე იპოვა, რომელშიც „ოცნების“ დეპუტატის ენზელ მკოიანის ძმის, მარტუნ მკოიანის პირადობის დამადასტურებელი მოწმობდა იდო. ამავე საფულეში, როგორც ენმ–ს ერთ–ერთი ლიდერი ნიკა მელია ამბობს, იდო ფურცელი, ამ ფურცელზე კი ახალქალაქში ენმ–ს რაიონული ორგანიზაციის ხელმძღვანელის აშოტ რაისიანის მანქანის ნომერია მითითებული. თავდამსხმელები კი პირველი, როგორც მელია ამბობს, სწორედ რაისიანს გაუსწორდნენ.





ენმ–ს ოფისიდან "ნაციონალური მოძრაობის" წარმომადგენლები ახალქალაქის საოლქო კომისიაში წავიდნენ. როგორც მელია აცხადებს, დღეს კომისიაში მათ წარმომადგენლებს მიშა აგაბაბიანს 23 უბნის შემაჯამებელ ოქმებზე ხელმოწერების შესაძლო გაყალბებასთან დაკავშირებით საჩივარი უნდა შეეტანა, თუმცა, იმის გამო, რომ მას ფიზიკურად გაუსწორნენ განცხადება ვეღარ დაარეგისტრირა. ამიტომ მან თანაგუნდელებთან ერთად გადაწყვიტა, რომ საჩივარი ოლქში შეეტანა. თუმცა მათ კომისიის კარი დაკეტილი დახვდათ.





შეგახსენებთ, რომ ენმ–ს ოფისზე თავდასხმა დღეს, 30 ოქტომბერს, დაახლოებით, 13:00 საათზე მოხდა. ენმ–ს რაიოული ორგანიზაციის ხელმძღვანელი აშოტ რაისიანი ამბობს, რომ მას და მის თანაგუნდელებს თავს, ახალქალაქსა და ნინოწმინდაში "ოცნების" დეპუტატი ენზელ მკოიანი და მისი ძმა დაესხნენ. შემთხვევის შედეგად ოთხი ადამიანი დაშავდა და ოთხივე მათგანი ახალქალაქის ცენტრალურ საავადმყოფოში გადაიყვანეს. მათ შორის ერთის მდგომარეობა მძიმეა და იგი ამ წუთებში თბილისში გადაჰყავთ. სამს კი, როგორც ექიმები აცხადებენ სახის დაზიანებები თავისა და სახის არეში აქვთ მიყენებული.

შინაგან საქმეთა სამინისტრო მომხდარს სსკი–ის 239 მუხლის მეორე და მესამე ნაწილით იძებს. რაც გულისხმობს წინასწარი შეთანხმებით ჯგუფის მიერ ჩადენილ ხულიგნობას, რა დროსაც გამოყენებული იყო ცეცხლსასროლი იარაღი, ან იარაღად სხვა საგანი.

[sknews.ge]