მგფ: აბასთუმანში კომპენსაცია ყველა გასახლებულ ოჯახს დაერიცხა

„მუნიციპალური განვითარების ფონდიდან“ წერილობით გამოთხოვილ ინფორმაციაში ვკითხულობთ, რომ ამ დროისთვის სახლების რეაბილიტაციის მეორე ეტაპი აბასთუმანში შვიდ სახლზე, რუსთაველის ქუჩის N58–ში, N64–ში, N70–ში, N78–ში, N84-ში, N86–სა N98–ში მიმდინარეობს.

განსახლების სამოქმედო გეგმის შესაბამისად და სამუშაოების სირთულეებიდან გამომდინარე კი დროებითი გასახლება რუსთაველის N58–ში, N64–ში, N70–ში, N84–სა და N86–ში მცხოვრებ 20 ოჯახს შეეხო. უწყების ინფორმაციით, მათ შესაბამის საბანკო ანგარიშებზე თანხები უკვე დაერიცხათ.

მგფ–ის ინფორმაციით კომპენსაცია მიიღო, N84–ში მცხოვრებ მარინა მანუკიანმაც, რომელიც „სამხრეთის კარიბჭესთან“ აცხადებდა, რომ ქირით გადავიდა, თუმცა თანხა არ დარიცხვია.

გარდა სამოქმედო გეგმით გათვალისწინებული სახლებისა, „მუნიციპალური განვითარების ფონდს“ კიდევ ერთი, რუსთაველის N80-ში მდებარე ბინის სახურავის შეკეთებაც მოუწია. აქ მცხოვრებმა ოჯახმა უწყებას წერილობით მიმართა და დაზამთრებამდე სახურავის შეკეთება თავად სთხოვა. „მუნიციპალური განვითარების ფონდს“ N80-ში მდებარე სახლის რეაბილიტაცია დაგეგმილი 2019 წელს ჰქონდა, თუმცა, როგორც უწყებაში აცხადებენ, მიმართვა გაითვალისწინეს და სახურავის შეკეთება დაიწყეს. ამის გამო, ფონდის ინფორმაციით, აქ მცხოვრები ოჯახი კომპენსაციას 2019 წელს მიიღებს.

"პროექტის საწყის ეტაპზე გამოცხადდა ტენდერი და ფონდის მიერ დაქირავებული დამოუკიდებელი კონსულტანტის მიერ განხორციელდა შესაბამისი კვლევები, რის მხიედვითაც განსახლების საჭიროების მქონე ფართებზე განისაზღვრა შესაბამისი კომპენსაციები. ასევე, ჩატარდა საჯარო და ინდივიდუალური შეხვედრები მოსახლეობასთან, რომლებიც გაეცნენ განსახლების სამოქმედო გეგმას. უნდა აღინიშნოს ისიც, რომ ფონდში მსოფლიო ბანკის რეგულაციების შესაბამისად მოქმედებს საჩივრების განმხილველი მექანიზმი და შესაბამისად საჩივრის არსებობის შემთხვევაში, მსოფლიო ბანკთან შეთანხმებით სწრაფად და ეფექტურად მოხდება საკითხის გადაწყვეტა“,– ვკითხულობთ მგფ–დან მიღებულ წერილში.

სარეაბილიტაციო სამუშაოების მესამე ეტაპი აბასთუმანში 2019 წელს დაიწყება.

შეგახსენებთ, რომ აბასთუმანში 18 სახლის სარეაბილიტაციო სამუშაოები მიმდინარე წლის აპრილში დაიწყო. შენობების რეაბილიტაციისთვის 3 715 305 ლარი იხარჯება.

[ლუბა გიორგაძე, ადიგენი]