აბასთუმანში მათ, ვისი სახლების რეაბილიტაციაც იგეგმება, დროებით შენობების დატოვება მოუწევთ

კურორტ აბასთუმანში, რუსთაველის ქუჩაზე, ექვსი ისტორიული შენობის აღდგენა მიმდინარეობს.

„ექვსივე სახლზე სარეაბილიტაციო სამუშაოები ერთდროულად ტარდება. ვაკეთებთ სახურავებს, ვაპირკეთებთ ფასადებს. მუშაობას სექტემბრის ბოლოს დავასრულებთ, მაგრამ შემდეგ ეტაპს როდის დავიწყებთ, ვერ გეტყვით. მერე ისეთი სახლების რეაბილიტაციას უნდა ჩატარდეს, რომლებშიც ადგილბორივები ცხოვრობენ და მათი გადაყვანა როგორ მოხერხდება ვერ გეტყვით “, – ამბობს მშენებელი კომპანიის შპს „ერისიმედის“ სამუშაოების მწარმოებელი გელა ყოლბაია.

აბასთუმანში სამუშაოების დამკვეთი „მუნიციპალური განვითარების ფონდია“. უწყებაში აცხადებენ, რომ სამუშაოების წარმოება ეტაპებად დაყოფილი არ არის და შემდეგი სახლების რეაბილიტაცია მაშინვე გაგრძელდება, როგორც კი ექვსი შენობის რემონტი დასრუდლება: „იმ სახლების ნაწილიდან, რომლებსაც რეაბილიტაცია უნდა ჩაუტარდეთ, ადგილბორივების გამოყვანა აუცილებელია. თუმცა, არის ისეთი სახლები, სადაც რემონტის მიმდინარეობისას დარჩებიან თუ არა, ეს მათ სურვილზეა დამოკიდებული“.

თუ რამდენ ოჯახს მოუხდება დროებით გასახლება, ან სად მოუწევთ მათ სარეაბილიტაციო სამუშაოებისას ცხოვრება, ამ შეკითხვებზე პასუხებს „მუნიციპალური განვითარების ფონდი“ წერილობით მოგვაწვდის.

ამ დროისთვის აბასთუმანში 40–მდე მუშაა დასაქმებული. სარეაბილიტაციო სამუშაოები აქ აპრილის ბოლოს დაიწყო. კურორტზე რეაბილიტაცია სულ 18 ისტორიულ შენობას უნდა ჩაუტარდეს. სამუშაოებისთვის 3 715 305 ლარია განსაზღვრული.

სატენდერო დოკუმენტების მიხედვით, პროექტი ითვალისწინებს ძველი დაზიანებული სახურავების, ხის სახურავების და კონსტრუქციების, კარებებისა და ფანჯრების, დაზიანებული იატაკების, აივნების ჭერის და კიბეების დემონტაჟს. რეაბილიტაციის შედეგად სახლები გადაიხურება თუნუქის ახალი სახურავებით, ხოლო მოჩუქურთმებული ხის აივნების დაზიანებულ ნაწილებს მსგავსი დეტალებით ჩაანაცვლებენ. რეაბილიტაცია ჩაუტარდება ამ სახლებს შორის მდებარე ბულვარებსაც, ტროტუარები ბაზალტის ფილებით მოპირკეთდება, ასევე, მოეწყობა ღამის განათება.

რეაბილიტაციის დასრულების შემდეგ, კულტურული მემკვიდრეობის დაცვის ეროვნული სააგენტო რეაბილიტირებული საკუთრების მოვლა პატრონობის თაობაზე მესაკუთრეებთან ხელშეკრულებებს გააფორმებს.

[ლუბა გიორგაძე, ადიგენი]