აბასთუმანში ისტორიული სახლების რეაბილიტაციის გამო 20 ოჯახია გასახლებული

საქართველოს მუნიციპალური განვითარების ფონდში ამბობენ, რომ სახლების რეაბილიტაციის გამო 20 ოჯახი დროებით გასახლებულია: „მათ კომპენსაცია ანგარიშზე უკვე დაერიცხათ“.

უწყების ცნობით, ამ დროისთვის ორ ისტორიულ სახლზე მხოლოდ სამღებრო სამუშაოებია დარჩენილი და როგორც კი დათბება დაასრულებენ. დანარჩენ სახლებზე კი სამუშაოების 60–80% უკვე შესრულებულია, მოწყობილია სახურავები და სამუშაოები გარე ფასადებზე მიმდინარეობს.

„მესამე ეტაპზე ექვსი სახლის სარეაბილიტაციო სამუშაოებია დაგეგმილი. ამ სახლებიდან დროებით 15 ოჯახის გასახლდება იქნება საჭირო. განსახლებასთან დაკავშირებული პროცედურები სამუშაოების დაწყებამდე კიდევ ერთხელ წინასწარ შეთანხმდება მოსახლეობასთან“, – აცხადებენ მუნიციპალური განვთარების ფონდში.

აბასთუმანში, რუსთაველის ქუჩაზე რეაბილიტაცია სულ 18 ისტორიულ შენობას უნდა ჩაუტარდეს. შენობების რეაბილიტაციისთვის 3 715 305 ლარია განსაზღვრული. სამუშაოებისთვის გათვალისწინებული ვადა 18 თვეა.

[ლუბა გიორგაძე, ადიგენი]