აბასთუმანში ისტორიული სახლების რეაბილიტაცია 4 თვეში დასრულდება [ფოტო]

სამუშაოთა მწარმოებლის გელა ყოლბაიას თქმით, ამ დროისათვის სარეაბილიტაციო სამუშაოები 17 სახლზე მიმდინარეობს: „სახლების ნაწილი თითქმის დასრულებულია, უბრალოდ ფასადები შეიღებება და ამით დასრულდება. ერთი სახლია დარჩენილი სადაც საერთოდ არ დაგვიწყია სამუშაოები. ერთი ოჯახი ცხოვრობს და ველოდებით მის დროებით გასახლებას“.

სარეაბილიტაციო სამუშაოების გამო, რამდენი ოჯახია ქირით გაყვანილი ჩვენთვის უცნობია. მუნიციპალური განვითარების ფონდში გვითხრეს, რომ ინფორმაცია წერილობით უნდა გამოვითხოვოთ.

კურორტ აბასთუმანში, 18 ისტორიული სახლის რეაბილიტაცია, გასული წლის აპრილში დაიწყო. სამუშაოებს მსოფლიო ბანკის დაფინანსებით, მუნიციპალური განვითარების ფონდი 3 715 305 ახორციელებს.

სატენდერო დოკუმენტების მიხედვით, პროექტით მიმდინარეობს ჯერ, ძველი დაზიანებული სახურავების, ხის სახურავების და კონსტრუქციების, კარებებისა და ფანჯრების, დაზიანებული იატაკების, აივნების ჭერის და კიბეების დემონტაჟი. შემდეგ, სახლები იხურება თუნუქის ახალი სახურავებით, ხოლო მოჩუქურთმებული ხის აივნების დაზიანებულ ნაწილებს მსგავსი დეტალებით ანაცვლებენ. რეაბილიტაცია ჩაუტარდება ამ სახლებს შორის მდებარე ბულვარებსაც, ტროტუარები ბაზალტის ფილებით მოპირკეთდება, ასევე, მოეწყობა ღამის განათება.

რეაბილიტაციის დასრულების შემდეგ, კულტურული მემკვიდრეობის დაცვის ეროვნული სააგენტო რეაბილიტირებული საკუთრების მოვლა–პატრონობის თაობაზე მესაკუთრეებთან ხელშეკრულებებს გააფორმებს.









[ლუბა გიორგაძე, ადიგენი]