აბასთუმანში სარეაბილიტაციო სამუშაოების გამო სახლებს დროებით 20 ოჯახი დატოვებს

მუნიციპალური განვითარების ფონდში ამბობენ, რომ ოჯახების გამოსახლება ეტაპობრივად მოხდება, თუმცა, ნებისმიერი ახლად გამოვლენილი გარემოების შემთხვევაში, შესაძლოა, გარდა 20 ოჯახისა სახლების დატოვება დროებით სხვებსაც მოუხდეთ. ამის შესახებ ყველა ოჯახს წინასწარ გააფრთხილებენ, ასევე წინასწარ მიიღებენ კომპენსაციასაც.

„მუნიციპალური განვითარების ფონდმა დაიქირავა კონსულტანტი, რომლის მიერ ჩატარებული კვლევების მიხედვითაც, იმ უძრავ ქონებებზე, რომლებზეც წარმოიშობა მესაკუთრეთა/მფლობელთა განსახლების საჭიროება, განისაზღვრა შესაბამისი კომპენსაციები“, – ნათქვამია „სამხრეთის კარიბჭეს“ მიერ მუნიციპალური განვითარების ფონდიდან გამოთხოვილ წერილში.

უწყების ინფორმაციით აბასთუმანში 18 ისტორიული შენობიდან, რომლებსაც რეაბილიტაცია უტარდებათ, ერთი სახელმწიფო საკუთრებაა, სამი შენობა–ნაგებობა სახელმწიფო და კერძო პირების თანასაკუთრებაშია, ორი ნაგებობა კერძო სამართლის იურიდიული პირების საკუთრებაა, დანარჩენი კი საცხოვრებელ ფართებს წარმოადგენს და კერძო პირების მფლობელობაშია.
ამ დროისათვის რეაბილიტაცია ექვს შენობა–ნაგებობას უტარდება.

შეგახსენებთ, რომ ამ დროისთვის აბასთუმანში 40–მდე მუშაა დასაქმებული. სარეაბილიტაციო სამუშაოები აქ აპრილის ბოლოს დაიწყო და 18 თვეში უნდა დასრულდეს. პროექტისთვის განსაზღვრული 3 715 305 ლარია.

[ლუბა გიორგაძე, ადიგენი]