აქციის მონაწილეები კუბლაშვილის გადადგომას ითხოვენ

უფლებადამცველისა და სამოქალაქო ჩართულობის ცენტრის წარმომადგენელის ლევან გოგიჩაიშვილის განცხადებით, კუბლაშვილი წლების განმავლობაში სააკაშვილის რეჟიმის ერთ-ერთი მნიშვნელოვანი წარმომადგენელი იყო: „ამ ქვეყანაში საპროტესტო აქციებით შეიცვალა ხელისუფლება და კუბლაშვილის შეცვლასაც შევძლებთ“.

მისი თქმით, ყველაფერი გაკეთდება იმისთვის, ქვეყანაში იყოს ობიექტური სასამართლო: „მოსამართლეები, რომლებმაც წლების განმავლობაში ათასობით განაჩენი გამოიტანეს, არ იმსახურებენ მოსამართლეობას“.

გოგიჩაიშვილი ამბობს, რომ ჯეირანაშვილმა ციხიდან თავისი დამნაშავე მეგობრები გაათავისუფლა: „ვიცით, რომ ჯეირანაშვილი წლების განმავლობაში იყო პოლიციის თანამშრომელი. ჯეირანაშვილი მერაბიშვილის ბანდის წევრია“.

გოგიჩაიშვილი აცხადებს, რომ ასეთი ადამიანები ქვეყნის ხელისუფლების სათავეში ვერასდროს დაბრუნდებიან.

შეგახსენებთ, ბორჯომსა და ახალციხეში საპროტესტო აქციები არაადამიანურ მოპყრობაში ბრალდებული 5 პირის გათავისუფლების გამო დაიწყო. 4 ივლისს აქცია ბორჯომში გაიმართა, აქციის მონაწილეებმა ბორჯომში ცენტრალური მაგისტრალი გადაკეტეს. 5 ივლისს აქცია ახალციხეში გაიმართა. მონაწილეებმა სასამართლოს ცოცხები, კვერცხები და პომიდვრები დაუშინეს. სასამართლოს შესასვლელი კარი კი ცოცხით ამოქოლეს. დღეს, 6 ივლისს, კი აქცია ბორჯომში მიმდინარეობს. აქციას გოგა ხაინდრავა და ირმა ინაშვილი შეუერთდნენ.

[sknews.ge]