ბორჯომში საპროტესტო აქცია დასრულდა

ბორჯომში დაგეგმილი საპროტესტო აქცია 15:00 საათზე დაიწყო და ერთ საათში დასრულდა.

ქალაქის ცენტრალურ მოედანზე აქცია დაიწყო შეძახილებით: „სასამართლო კუბლაშვილის გარეშე“, „ხვედელიანი ციხეში“, „დაისაჯოს ჯეირანაშვილი“, „ქვეყანა მოძალადეების გარეშე“.

თბილისიდან ჩამოსულ აქციის ათობით მონაწილე ბორჯომის ცენტრში შეკრებილ მოსახლეობას შეუერთდა. აქციას ხვედელიანის საქმეში დაზარალებულად ცნობილი ვ.გ და იმ გარდაცვლილის დედა და ბებიაც ესწრებოდნენ, რომლის სიკვდილშიც ხვედელიანს ადანაშაულებენ. ისინი აცხადებენ, რომ მანამდე არ გაჩერდებიან, სანამ დამნაშავეებს ციხეში არ ჩასვამენ.

დღევანდელ აქციას მწერალი ერეკლე საღლიანიც ესწრებოდა: „რატომ ვარ აქ? იმიტომ, რომ სხვანარად არ შემიძლია, მე რომ სხვანაირი ცხოვრება შევძლო, ადამიანურ ფუნქციას დავკარგავ. მე აქ რატომ ვარ კი არადა, რატომ არ არინ აქ სხვები?! აი ეს არის საკითხავი“.

მისი თქმით, მოძალადეებად დედის მუცლიდან არ იბადებიან: „ასეთებს ქმნიან სამწუხაროდ და ქმნიან ჩვენი ხელშეწყობით, ჩვენი დუმილის საფუძველზე. არ იფიქროთ, რომ ეს არის ერთი ოჯახის უბედურება. ეს არის ეროვნული უბედურება“.

აქციის მონაწილეებს გზა არ გადაუკეტავთ. ბორჯომის ცენტრალური მოედანი, სადაც აქცია მიმდინაროებდა, ამ დროისთვის თავისუფალია.
აქციის მონაწილეებმა შემდეგი აქცია ახალციხეში, 11 ივლისს, 15:00 საათზე დააანონსეს.

შეგახსენებთ, ბორჯომსა და ახალციხეში საპროტესტო აქციები არაადამიანურ მოპყრობაში ბრალდებული 5 პირის გათავისუფლების გამო დაიწყო. 4 ივლისს აქცია ბორჯომში გაიმართა, აქციის მონაწილეებმა ბორჯომში ცენტრალური მაგისტრალი გადაკეტეს. 5 ივლისს აქცია ახალციხეში გაიმართა. მონაწილეებმა სასამართლოს ცოცხები, კვერცხები და პომიდვრები დაუშინეს. სასამართლოს შესასვლელი კარი კი ცოცხით ამოქოლეს. დღეს, 6 ივლისს, კი აქცია ბორჯომში მიმდინარეობს. აქციას გოგა ხაინდრავა და ირმა ინაშვილი შეუერთდნენ.

[sknews.ge]