ხაინდრავა - ხვედელიანის შემდეგ მერაბიშვილი და ახალაია გამოვლენ გარეთ

მისი თქმით, ხეობაში, სადაც ახლა იმყოფებიან, ყოველთვის განსაკუთრებული მნიშვნელობა ჰქონდა სიმართლეს, სინდისსა და თავგანწირვას: „ამიტომ ბუნებრივია, რომ დღეს ჩვენ აქ ვართ ამ მძიმე განსაცდელის ჟამს, რადგან რაც ახალციხეში რამდენიმე დღის წინ მოხდა, ეს მთელ საქართველოს ემუქრება. ეს არის ღირსების აყრა ქართველი ხალხისთვის, ეს არის ძალადობის პროპაგანდა. 9 წლის განმავლობაში რასაც ბარბაროსული რეჟიმი სჩადიოდა, ეს იმის გაგრძელებაა“.

ხაინდრავა აცხადებს, რომ კუბლაშვილის სახით დღეს საქართველოში სასამართლო სისტემას დამნაშავე უდგას სათავეში: "ჩვენ აქედან ვიწყებთ სამოქალაქო მოძრაობას, რომელიც მიზნად ისახავს ბოროტმოქმედების მოცილებას ხელისუფლების იმ შტოდან, რომელიც ყველაზე მნიშვნელოვანია ჩვენი ქვეყნისთვის და ეს არის სასამართლო. იმას, რაც 9 წლის განმავლობაში ხდებოდა, ციხის კადრები და ის, რაზეც ჩვენ დღეს აქ ვართ შეკრებილი, ნამდვილად ხდებოდა და მას თავისი ავტორები ჰყავს, ან არ ხდებოდა. ჩვენ ვითხოვთ გაგვარკვიონ ადგილი ჰქონდა წამებას თუ ცილისწამებას".

შეგახსენებთ, ბორჯომსა და ახალციხეში საპროტესტო აქციები არაადამიანურ მოპყრობაში ბრალდებული 5 პირის გათავისუფლების გამო დაიწყო. 4 ივლისს აქცია ბორჯომში გაიმართა, აქციის მონაწილეებმა ბორჯომში ცენტრალური მაგისტრალი გადაკეტეს. 5 ივლისს აქცია ახალციხეში გაიმართა. მონაწილეებმა სასამართლოს ცოცხები, კვერცხები და პომიდვრები დაუშინეს. სასამართლოს შესასვლელი კარი კი ცოცხით ამოქოლეს. დღეს, 6 ივლისს, კი აქცია ბორჯომში მიმდინარეობს. აქციას გოგა ხაინდრავა და ირმა ინაშვილი შეუერთდნენ.

[sknews.ge]