მერია დარღვევით გაკრულ პლაკატებზე: თუ არ ვიცით ვინ გააკრა, ოქმს ვერ შევადგენთ

ახალციხის მერიის ზედამხედველობის სამსახურში შეტყობინება ორი ფაქტის შესახებ შევიდა. ერთი საბარგო სადგურზე, ხიდზე, „ნაციონალური მოძრაობის“ პრეზიდენტობის კანდიდატის გრიგოლ ვაშაძის პლაკატების გაკვრას ეხებოდა, ხოლო მეორე მარდის დასახლებაში „ევროპული საქართველოს“ პრეზიდენტობის კანდიდატის დავით ბაქრაძის პლაკატების განთავსებას. არცერთი ტერიტორია იმ ადგილების ჩამონათვალში არ არის შეტანილი, რომლებიც ახალციხის საკრებულომ წინასაარჩევნო მასალების განსათავსებლად განსაზღვა.

„ორივე შემთხვევაში დარღვევაა, მაგრამ არ ვიცით ვინ გააკრა, შემოსულ შეტყობინებებს თან არ ახლდა არც ფოტო და არც ვიდეო მასალა, რითიც დადგინდებოდა ის, თუ ვინ აკრავდა ამ სააგიტაციო მასალებს. ამიტომ ვერავის შევუდგენთ სამართალდარღვევის ოქმს“, – გვითხრა ახალციხის მერიის ზედამხედველობის სამსახურის უფროსმა მიხეილ მაკარიძემ.

მისივე თქმით, მათ ქალაქში საარჩევნო სააგიტაციო მასალის დარღვევის გაკვრის გამო ერთი პირი დააჯარიმეს, თუმცა, ეს ის შემთხვევა იყო, როცა ზედამხედველობის სამსახურის თანამშრომლები ფაქტს შეესწრნენ: „ნაციონალური მოძრაობის“ წარმოამდგენელი რუსთაველის ქუჩაზე, საავადმყოფოს ასახვევთან აკრავდა ვაშაძის პლაკატებს. შევუდგინეთ ოქმი და ჩავაბარეთ. მან დაგვიდასტურა, რომ პარტიის წევრი იყო".

შეგახსენებთ, რომ საბარგო სადგურზე დარღვევით გაკრული პლაკატები „ქართული ოცნების“ წარმომადგენლმა, მარდის დასახლებაში კი „სამხრეთის კარიბჭემ“ დააფიქსირა.

[თამუნა უჩიძე, ახალციხე]