სხვილისში ბაქრაძის პლაკატების გაკვრას სიტყვიერი დაპირისპირება მოჰყვა

შემთხვევა დღეს, 16 სექტემბერს დაახლოებით 18:30 საათზე მოხდა.

როგორც „ევროპული საქართველოს“ წარმომადგენელი პაატა ხითარიშვილი ჰყვება, სხვილისის შესასვლელში, ომის ვეტერანთა მემორიალის მიმდებარე კედელზე პლაკატებს აკრავდნენ, რასაც სოფელში ახალციხის მერის წარმომადგენლის გეორქ ექნოსიანის გაღიზიანება მოჰყვა.

„შესასვლელში, მემორიალის კედელთან, გზის ნაპირზე გავაკარით პლაკატები, ვიღაცამ დაგვინახა და მერის წარმომადგენელს უთხრა. სოფლის ცენტრში რომ ჩავედით გეორქ ექნოსიანი იქ ნასვამ მდგომარეობაში დაგვხვდა და გვითხრა, რომ არ გვქონდა მანდ, პლაკატების გაკვრის უფლება“, – ამბობს „ევროპული საქართველოს“ წარმომადგენელი პაატა ხითარიშვილი.

საარჩევნო სააგიტაციო მასალების განთავსებისათვის, ახალციხის მუნიციპალიტეტის საკრებულოს მიერ დამტკიცებული ნუსხის მიხედვით, სოფელ სხვილისში პლაკატების გაკვრა შესაძლებელია ძველი სკოლის შენობაზე, პარკის ღობეზე, ამბულატორიის შენობის ფასადზე და გზის ნაპირებზე. თუმცა, სხვილისში მერის წარმომადგენელი გეორქ ექნოსიანი ამბობს, რომ ომის ვეტერანთა მემორიალთან პლაკატების გაკვრა მისთვის მიუღებელია.

„ეს, ომის ვეტერანთა მემორიალია, ჩემთვის წმინდა ადგილია, როგორც ეკლესია. მე უბრალოდ ვთხოვე, რომ პლაკატები მანდ არ გაეკრათ. სხვაგან სადაც უნდათ იქ გააკრან, მე არაფერს ვუშლი“, – გვითხრა გევროქ ექნოსიანმა.

„ევროპული საქართველოს“ წევრების თქმით, იმის გამო რომ, სიტუაცია არ გაემწვავებინათ მემორიალის მიმდებარედ პლაკატები ჩამოხსნეს –„ოთხი პლაკატი გვქონდა გაკრული და ჩამოვხსენით“.

[ლუბა გიორგაძე, ახალციხე]