ახალქალაქში საგზაო ნიშანზე გრიგოლ ვაშაძის პლაკატები გააკრეს

ოპოზიციური გაერთიანების "ძალა ერთობაშია" ახალქალაქის რაიონულ ორგანიზაციაში ამბობენ, რომ საგზაო ნიშანზე გაკრული პლაკატის შესახებ არაფერი იციან და ამ ფაქტის შესახებ "სამხრეთის კარიბჭესგან" შეიტყვეს.

"არაფერი ინფორმაცია გვაქვს მაგაზე, როგორ შეიძლება საგზაო ნიშანზე პლაკატი მიაკრა?! ვიცით, რომ აკრძალვაა. ახლავე გადავამოწმებთ და რეაგირებას მოვახდენთ", – განაცხადა "სამხრეთის კარიბჭესთან" საუბარში "ძალა ერთობაშიას" ახალქალაქის რაიონული ორგანიზაციის თავმჯდომარემ, აშოტ რაისიანმა.

რაიონული ორგანიზაციის მსგავსად, ახალქალაქის მუნიციპალიტეტის მერიაშიც ამბობენ, რომ პლაკატების საგზაო ნიშანზე გაკვრის შესახებ ინფორმაცია არ აქვთ.

"თქვენგან მესმის, მსგავსი არ შეგვიმჩნევია. აუცილებლად დავინტერესდებით და შესაბამის რეაგირებას მოვახდენთ",– ამბობს ახალქალაქის მერი იურიკ უნანიანი.

ახალგაზრდა იურისტთა ასოციაციის იურისტის, ქეთი ბებიაშვილის თქმით, საგზაო ნიშნებზე საარჩევნო–სააგიტაციო მასალების განთავსება აკრძალულია, რაც საარჩევნო კოდექსის 46–ე მუხლით არის გათვალისწინებული –"ამიტომ თვითმმართველობის ზედამხედველობის სამსახურმა უნდა მოახდინოს რეაგირება და პლაკატები ჩამოხსნას".

[ლუბა გიორგაძე, ახალქალაქი]