ახალციხის მერიამ ენმ–ს წევრი განათების ბოძებზე პლაკატების გაკვრისთვის დააჯარიმა

ახალციხის მუნიციპალიტეტის მერიის ზედამხედველობის სამსახურის უფროსის მიხეილ მაკარიძის თქმით, მათ „ნაციონალური მოძრაობის“ წევრი ალექსანდრე ინასარიძე 50 ლარით დააჯარიმეს.

„რუსთაველის ქუჩაზე, საავადმყოფოს ასახვევთან შევესწარით, რომ აკრავდა პრეზიდენტობის კანდიდატის გრიგოლ ვაშაძის პლაკატებს. შევუდგინეთ ოქმი და ჩავაბარეთ. მან დაგვიდასტურა, რომ პარტიის წევრია. თუ ერთ თვეში არ გადაიხადა ჯარიმა, მაშინ ორმაგად მოუწევს გადახდა“, – ამბობს მაკარიძე.

ქალაქში ვაშაძის პლაკატების არასწორად გაკვრისთვის, რომ 50 ლარით დაჯარიმდენენ ამაზე ახალციხეშ „ნაციონალური მოძრაობის“ ერთ–ერთი ლიდერი ირაკლი ბარძიმაძეც საუბრობს. მისი თქმით, მათ აღნიშნული ჯარიმა უკვე გადაიხადეს.

[თამუნა უჩიძე, ახალციხე]