ახალციხეში ვაშაძის პლაკატების გამო „ოცნებამ“ საჩივარი დაწერა

ახალციხის საკრებულოში ფრაქცია „ქართული ოცნების“ თამჯდომარის გიორგი გვარამაძის თქმით, მათ ვაშაძის პლაკატები საბარგო სადგურზე, ხიდზე, ორი დღის წინ შენიშნეს და ამის შესახებ პარტიის ცენტრალურ ოფისს შეატყობინეს: „ეს ტერიტორია საკრებულოს მიერ წინასაარჩევნო აგიტაციისთვის გამოყოფილი ადგილების ნუსხაში არ არის. ამიტომ ამის შესახებ მივწერეთ პარტიას, მათ კი განცხადება უწყებათშორის კომისიაში შეიტანეს და იმსჯელებენ“.

„ნაციონალური მოძრაობის“ ახალციხის რაიონულ ორგანიზაციაში ამბობენ, რომ საბარგო სადგურზე გაკრული პლაკატების შესახებ არაფერი იციან: „ჩვენს აქტივისტებს, რომლებიც პლაკატებს აკრავენ, საკრებულოს დამტკიცებული ნუსხა აქვთ და აკრძალულ ადგილებში ვერ გააკრავდნენ. რატომაა მანდ გაკრული ვერ გეტყვით“, – ამბობს ენმ–ს რაიონული ორგანიზაციის თავმჯდომარემ დავით ბალიაშვილი.

ახალციხის მუნიციპალიტეტის საკრებულომ, საარჩევნო სააგიტაციო მასალების განთავსების ადგილები 10 აგვისტოს სხდომაზე განსაზღვრა, ჩამონათვალში კი საბარგო სადგურზე ხიდი ნახსენები არ არის.

იურისტები ამბობენ, რომ იმ შემთხვევაში, როცა მასალა წინასწარ განსაზღვრულ ადგილზე არ იკვრება, ქალაქის იერსახე მახინჯდება და ამისთვის პარტია ადმინისტრაციული წესით ჯარიმდება.

„ამ შემთხვევაში, რეაგირება მუნიციპალიტეტმა, ან შსს–მ უნდა მოახდინოს. ადმინისტრაცოიულ სამართალდარღვევათა კოდექსის მიხედვით კი ჯარიმის ოდენობა 50 ლარიდან იწყება“, – ამბობს „საერთაშორისო გამჭვირვალობა –საქართველოს“ იურისტი გიგი ჩიხლაძე.
არც შსს–სა და არც ახალციხის მერიაში აღნიშნულთან დაკავშირებით ინფორმაცია არ აქვთ.

„ამ შემთხვევაში არა თუ პარტია, არამედ ის პირი უნდა დაჯარიმდეს ვინც პლაკატები გააკრა. ჩვენ კი ამის შესახებ ინფორმაცია არ გვაქვს“, – გვითხრეს ახალციხის მერიაში.



[ლუბა გიორგაძე, ახალციხე]