ახალციხის მუნიციპალიტეტში სარეკლამო პლაკატებს ხევენ

დღეს, 30 მაისს, დილით, თამარაშვილის ქუჩის მაჟორიტარობის კანდიდატს „ნინო ბურჯანაძე - ერთიანი ოპოზიციიდან“, ია ხარაიშვილს, მისივე ქუჩაზე პლაკატები ჩამოხეული დახვდა. საღამოს კი აღმოაჩინა, რომ ჩამოხევას გადარჩენილ პლაკატებზე ზემოდან სხვა საარჩევნო სუბიექტის პლაკატებია გადაკრული. როგორიცაა მაგალითად: „იძებნება 100 ქარხანა“.

მან საკუთარი პლაკატები 7 დღის წინ მაღაზიებსა და გარე განათების ბოძებზე გააკრა.

„სკოჩით“ დავამაგრე, რადგან წებო შემდეგ რთულად მოსაშორებელია, მაგრამ დღეს დილით, სახლიდან გამოსვლისას, მაღაზიებზე და 5-მდე გარე განათების ბოძზე, ჩამოხეული დამხვდა. საშინელებაა, როცა შენს სახეს ძირზე დაგდებულს ხედავ. შემრცხვა, რომ ახალციხელი ვარ“, - ამბობს ხარაიშვილი და ამატებს, რომ არ იცის ამას ვინ რა მიზნით აკეთებს.

სარეკლამო პლაკატების დაზიანების შესახებ საუბრობს „ნინო ბურჯანაძე - ერთიანი ოპოზიციის“ რეგიონული შტაბის კოორდინატორი ჯიმშერ გოგოლაურიც: „ჩვენი პლაკატები ყველგან ჩამოხეულია, როგორც კი გავაკრავთ, მაშინვე ხევენ“.

ჩამოხეული და დაზიანებულია „ერთიანი ნაციონალური მოძრაობის“ სარეკლამო პლაკატები, როგორც ქალაქში, ასევე სოფლებშიც.

„არაა დიდი ხანი, რაც პლაკატების გაკვრა დავიწყეთ, მაგრამ გამოფენისთანავე ხევენ“, - ამბობს „ნაციონალური მოძრაობის“ მერობის კანდიდატი ახალციხეში გელა დემეტრაძე.

მისი თქმით, განსაკუთრებით დაზიანებული ის სარეკლამო ბანერებია, რომლებსაც აწერია: „იძებნება სამუშაო ადგილები“ და „იძებნება 100 ახალი ქარხანა“.

„ჩემი ინფორმაციით, ამას სხვადასხვა მაჟორიტარი დეპუტატობის კანდიდატები აკეთებენ“, - აცხადებს დემეტრაძე.

სარეკლამო ბანერების დაზიანებაზე საუბრობს „ქართული ოცნების“ მერობის კანდიდატი გიორგი კოპაძეც: „ჩემი პლაკატების დიდი ნაწილი ჩამოხეულია, ან ზემოდან სხვა საარჩევნო სუბიექტების პლაკატებია გადაკრული. არ მინდა ამის გამო აჟიოტაჟი გამოვიწვიო, არადა დიდი დანაშაული გვაქვს სახეზე“.



[თამუნა უჩიძე, ახალციხე]