სამცხე–ჯავახეთში გრიგოლ ვაშაძის პლაკატებს КГБ დააწერეს და წითლად შეღებეს

გრიგოლ ვაშაძის პლაკატებია დაზიანებული ახალციხეში, ადიგენში, ასპინძაში, ბორჯომში, ნინოწმინდასა და ახალქალაქში.

ენმ–ს ადიგენის საოლქო ორგანიზაციის წარმომადგენელი დავით ოგანეზიანი ამბობს, რომ პლაკატები დაბაში გვიან ღამით დააზიანეს: „დილით ადრე ვდგები, რომ გამოვედი ვნახე, რომ ჩვენი კანდიდატის ყველა პლაკატი და ბანერი წითლადაა შეღებილი და КГБ აწერია. ეს პირველი შემთხვევაა, აქამდე მსგავსი რამ არ ყოფილა".




ადიგენში ენმ–ს წარმომადგენლებს ეჭვი მმართველ გუნდზე აქვთ: „ოცნების“ შტაბში მივედით ვითარების გასარკვევად, მაგრამ გვითხრეს ჩვენი გაკეთბული არ არისო".

პლაკატების დაზიანებაში "ოცნებას" ადანაშაულებენ ასპინძაშიც: "შეიძლება "ოცნების" მიერ წაქეზებული პირის გაკეთბულია ეგ წარწერები", – გვითხრა სატელეფონო საუბარში ასპინძაში ენმ–ს რაიონული ორგანიზაციის ხელმძღვანელმა მალხაზ მოსიძემ.

ანალოგიურია ვითარება ბორჯომშიც. "წითელი საღებავებითაა გაფუჭებული პლაკატები ყველგან. მთელს საქართველოში ორგანიზებულად გააკეთეს ეს. მე ამას ბარბაროსულ ხელისუფლებას ვუკავშირებ. მხოლოდ ბარბაროსებს შეუძლიათ ამის გაკეთება“, – ამბობს ბორჯომის საკრებულოს დეპუტატი ენმ–დან ბაკურ გელაშვილი.

ნინოწმინდაში ამბობენ, რომ აქ გრიგოლ ვაშაძის პლაკატები დახეულია, მაგრამ წითლად შეღებილი არ არის: „ასევე, პლაკატებზე ხუთიანები ორიანებად არის გადაკეთებული", – გვითხრა ენმ–ს წარმომადგენელმა ნინოწმინდაში თაქუი ვართანიანმა.

„ქართული ოცნების“ ახალციხის საოლქო ორგანიზაციის აღმასრულებელი მდივანი გიორგი გვარამაძე ენმ–ს ბრალდებებს უსაფუძვლოს უწოდებს:„თქვენგან მესმის ამის შესახებ, არ ვიცი რა მოხდა. ეს არის აშკარა გადაბრალება, შეიძლება მათი მხრიდან პროვოკაციაც იყოს, ან ისევ მაგ პარტიის გაკეთებული იყოს და სხვას აბრალებდნენ".

გრიგოლ ვაშაძის პლაკატები წითლად საქართველოს მასშტაბით სხვა მუნიციპალიტეტებშიც შეღებეს.

შინაგან საქმეთა სამინისტროში ამბობენ, რომ უწყებაში ინფორმაცია მომხდარის შესახებ არ შესულა: "ზოგადად, პლაკატების დაზიანების ფაქტზე ძიებას არ ვიწყებთ, ბილბორდები რომ ყოფილიყო დაზიანებული, გამოძიება დაიწყებოდა. ეს საკითხი თვითმმართველობამ უნდა შეისწავლოს".




[თინათინ ზაზაძე, სამცხე–ჯავახეთი]