ოჯახში ძალადობის 139 ფაქტი - 2018 წლის სამცხე–ჯავახეთის სტატისტიკა

მაჩვენებელი გასული წელთან შედარებით გაზრდილია. 2017 წელს ოჯახში ძალადობის 126 ფაქტია რეგისტრირებული და აქედან 84 გამოძიებულია. გასული წლის მონაცემებს ემატება მკვლელობის ორი და ჯანმრთელობის განზრახ დაზიანების ორი ფაქტი. ოთხივე მძიმე დანაშაული გახსნილია.

შინაგან საქმეთა სამინისტროში აცხადებენ, რომ გასულ წლებთან შედარებით, ოჯახურ დანაშაულზე მომართვიანობა გაზრდილია.

„2017 წლის მონაცემებით, 4 000–ზე მეტმა მომართა სამართალდამცავ ორგანოს. 9 თვის მონაცემებით კი - გამოცემული გვაქვს 5000-ზე მეტი შემაკავებელი ორდერი", - აცხადებს ადამიანის უფლებათა დაცვის დეპარტამენტის ხელმძღვანელი ლონდა თოლორაია.

მისი თქმით, მას შემდეგ, რაც რისკის შეფასების ინსტრუმენტი დაინერგა, შინაგან საქმეთა სამინისტროს სისტემაში გამოცემულია ყველაზე მეტი შემაკავებელი ორდერი, რაც იმას ნიშნავს, რომ რისკის შეფასების ინსტრუმენტი ეფექტიანად მუშაობს. ამასთანავე, მონიტორინგის პროცესში გამოვლინდნენ მოძალადეები, რაც იმას ნიშნავს, რომ მონიტორინგის ახალი მექანიზმიც მსხვერპლთა დაცვის მიზნით ეფექტიანად მუშაობს.

„ჩვენთვის უმთავრესი გამოწვევაა ელექტროსამაჯურების დანერგვა. ვფიქრობთ, წლის ბოლოსთვის შესაძლებელი იქნება, დაინერგოს ელექტროსამაჯურები. გავაგრძელებთ საინფორმაციო კამპანიებს. ასევე გაგრძელდება ოჯახში ძალადობის კუთხით გამომძიებლების სპეციალიზაციის პროცესი, რათა ყველა დანაყოფში გვყავდეს სპეციალიზებული ადამიანი, რომელიც იმუშავებს ამ მიმართულებით“, - ამბობს თოლორაია.



[sknews.ge]