არასამთავრობო ორგანიზაცია “სამართლიანი არჩევნებისა და დემოკრატიის საერთაშორისო საზოგადოება” (ISFED) 2018 წლის საპრეზიდენტო არჩევნები წინასაარჩევნო მონიტორინგის მეორე შუალედურ ანგარიშს ავრცელებს.
ორგანიზაციის ანგარიშში ყურადღება წინასაარჩევნო კამპანიის ფარგლებში გამოვლენილ დარღვევებზეა გამახვილებული. ანგარიში სამიდან 30 სექტემბრამდე პერიოდს მოიცავს. ამ ხნის განმავლობაში ორგანიზაციამ პოლიტიკური ნიშნით დაპირისპირების – ერთი, ამომრჩევლის სავარაუდო მოსყიდვის – ერთი, აგიტაციის წესების დარღვევის – 12, ადმინისტრაციული რესურსის გამოყენების – ცხრა, კამპანიისთვის ხელის შეშლის – რვა; სააგიტაციო მასალების დაზიანების – 14 ფაქტი გამოავლინა.
საანგარიშო პერიოდში დაფიქსირდა პარტიის მხარდაჭერილი დამოუკიდებელი კანდიდატის სალომე ზურაბიშვილის სასარგებლოდ ადმინისტრაციული რესურსის გამოყენების ფაქტები: „ადგილი ჰქონდა ადგილობრივი თვითმმართველობების მიერ ბიუჯეტით დაფინანსებული საკომუნიკაციო საშუალებების გამოყენებას წინასაარჩევნო მიზნით. ასევე, კანდიდატთან შეხვედრებზე შეინიშნებოდა ადგილობრივი საჯარო მოხელეების, პედაგოგების, ააიპ–ების თანამშრომლების მობილიზების შემთხვევები“.
წინასაარჩევნო კამპანიის მიმდინარეობისას „სამართლიანმა არჩევნებმა“ დააფიქსირა სამუშაო საათებში საჯარო მოხელეების მიერ პრეზიდენტობის კანდიდატის მხარდასაჭერი პოსტების სოციალურ ქსელებში გამოქვეყნების არაერთი შემთხვევა, რაც აგიტაციაში მონაწილეობის წესის დარღვევას და სავარაუდოდ, ადმინისტრაციული რესურსის გამოყენებას წარმოადგენს.
ISFED-ის განცხადებით, საანგარიშო პერიოდის განმავლობაში, ადგილობრივი მუნიციპალიტეტების მაღალჩინოსნების მიერ სოციალურ ქსელში ზურაბიშვილის მხარდამჭერი პოსტების გამოქვეყნების 11 ფაქტი დაფიქსირდა. ამისთვის ადგილობრივი თვითმმართველობების წარმომადგენლები როგორც მუნიციპალიტეტის ორიფიალურ, ასევე, ფეისბუქის პირად გვერდებს იყენებდნენ.
მაგალითად, 10 სექტემბერს, ბორჯომის კეთილმოწყობისა და დასუფთავების სამსახურის უფროსმა დავით ზაალიშვილმა სამუშაო საათებში ფეისბუქის პირად გვერდზე გამოაქვეყნა პრეზინდეტობის კანდიდატის სალომე ზურაბიშვილის არჩევნებში მონაწილეობის რიგითი ნომერი და მის შეხვედრებთან დააკვშირებული ინფორმაცია.
„სამართლიანი არჩევნების“ ანგარიშში მოხვდა ასპინის ოლქში N16 და N17 საუბნო საარჩევნო კომისიების პირველი სხდომები: „საუბნო კომისიის წევრები არ ფლობდნენ შესაბამის კომპეტენციას სხდომის სრულფასოვნად ჩატარებისთვის, ამიტომ საოლქო კომისიის წევრები მიუთითებდნენ პროცედურათა თანმიმდევრობაზე. უფრო კონკრეტულად, N17 ხერთვისის უბანზე, სხდომის დაწყებამდე ლუიზა ვაჭარიძე, არჩეული მდივანი ამბობდა, რომ მდივნობას ვერ შეძლებდა. კომისიის თავმჯდომარე ინგა მინაშვილი კი ამ საკითხს საოლქო კომისიის წევრებს უთანხმებდა.
ვაჭარიძე მდივნობას მხოლოდ მას შემდეგ დასთანხმდა, რაც გაუკრკვეველ პირებთან ტელეფონით ისაუბრა. ტელეფონზე მოსაუბრე პირი ვაჭარიძეს არწმუნებდა, რომ მდივნობა აუცილებელი იყო“.
„სამართლიანი არჩევნები“ პოლიტიკური ნიშნით დაპირისპირებაზე საუბრობს ახალქალაქის საარჩევნო ოლქში. ანგარიშში მოყვანილია „ნაციონალური მოძრაობიდან“ საოლქო კომისიის წევრის თეონა ჭალიძის მონათხრობი, რომელიც ამბობს, რომ მას ახალქალაქის საოლქო კომისიის თავმჯდომარე ჰასმიკ მარანგოზიანი
სიტყვიერად და ფიზიკურად დაუპირისპირდა.
მონიტორინგის პროცესში ინფორმაციის წყაროს წარმოადგენს როგორც ადმინისტრაციული დაწესებულებებიდან გამოთხოვილი ინფორმაცია, ასევე, უშუალოდ სარჩევნო სუბიექტებისგან, მედია–საშუალებებისგან და მოქალაქეებისგან მიღებული ინფორმაციაც.
[sknews.ge]