ზეწოლა პოლიტიკური ნიშნით და საარჩევნო კამპანიაში ხელისშეშლა – სამცხე–ჯავახეთი ISFED-ის მეოთხე ანგარიშში

სამართლიანი არჩევნებისა და დემოკრატიის საერთაშორისო საზოგადოების ანგარიშის მიხედვით, ახალციხეში, N20–ე სვირის საარჩევნო უბანზე, საუბნო კომისიის მდივნად „ერთიანი ნაციონალური მოძრაობის“ წევრის ჯერ არჩევა და შემდეგ შეცვლა, სავარაუდოდ პოლიტიკური ნიშნით ზეწოლის ფაქტი იყო.

ანგარიშის მიხედვით, 8 სექტემბერს, ახალციხის #44/37/20 საუბნო საარჩევნო კომისიის პირველი სხდომა გაიმართა. სხდომას კომისიის 11 წევრი და საოლქო საარჩევნო კომისიის წევრები - გიორგი ივანიძე, ქეთევან ივანიძე და ნათია დევაძე ესწრებოდნენ. სხდომაზე აირჩიეს კომისიის თავმჯდომარე, მოადგილე და მდივანი. კომისიამ მდივნად აირჩია ნათელა ბიბილური, რომელიც კომისიაში წარდგენილი იყო „ერთიანი ნაციონალური მოძრაობის“ მიერ. ბიბილურის მდივნის პოზიციაზე არჩევას კომისიის სხდომაზე დამსწრე ყველა წევრმა დაუჭირა მხარი. სხდომაზე შედგა ოქმი, სადაც ასახული იყო სხდომის შედეგები. მოგვიანებით, როდესაც ოქმი საუბნო კომისიიდან საოლქო კომისიაში მიიტანეს კომისიის არჩეულ მდივნად მითითებული იყო არა ნათელა ბიბილური, არამედ კომისიის სხვა წევრი - ოლქის მიერ დანიშნული, ეკატერინე ხალაძე.

ნათელა ბიბილურმა „სამართლიანი არჩევნების“ დამკვირვებელს განუცხადა, რომ საუბნო კომისიის სხდომიდან ოლქის წევრების წასვლის შემდეგ კომისიაში მოვიდა ორი ადამიანი, რომელთაგან ერთმა ნათელა ბიბილურს ურჩია უარი ეთქვა მდივნობაზე. ნათელა ბიბილური არ გადადგა და საუბნო კომისიას მდივნის გადასარჩევად ახალი სხდომა არ გაუმართავს, თუმცა საოლქო კომისიაში მიტანილი სხდომის ოქმში მდივნად სხვა კომისიის წევრი იყო მითითებული.

„სამართლიანი არჩევნების“ ინფორმაციით, პირი რომელიც საუბნო კომისიის სხდომაზე ნათელა ბიბილურს გადადგომას ურჩევდა „ქართული ოცნების“ ადგილობრივი შტაბის ხელმძღვანელი, გიორგი გვარამაძე იყო.

„8 სექტემბერს საოლქო საარჩევნო კომისიამ გამოიკვლია აღნიშნული ფაქტი. სხდომას ესწრებოდნენ #44/37/20 სვირის საუბნო კომისიის წევრებიც. საოლქო საარჩევნო კომისიის გადაწყვეტილებით, სვირის საუბნო საარჩევნო კომისიის თავმჯდომარეს, ბუღუტი ღონღაძესა და ეკატერინე ხალაძეს, რომელიც კანონის დარღვევით აღმოჩნდა მითითებული მდივნად სხდომის ოქმში, შეუწყდათ კომისიის წევრის უფლებამოსილება. მდივანი, ნათელა ბიბილური, საოლქო კომისიის გადაწყვეტილებით, კვლავ დარჩა საუბნო კომისიის მდივნის სტატუსით“, – ვკითხულობთ ანგარიშში.

მეოთხე ანგარიშში სამცხე–ჯავახეთიდან მოხვედრილი მეორე ფაქტი, საარჩევნო კამპანიის მიმდინარეობისთვის ხელის შეშლას გულისხმობს. როგორც ანგარიშშია აღნიშნული, შემთხვევა ადიგენში მოხდა.

„24 სექტემბერს, „ერთიანი ნაციონალური მოძრაობის“ ადგილობრივი შტაბის უფროსის სიმონ პარუნაშვილის ინფორმაციით, ადიგენში ჩამოსული იყო ლევან ვარშალომიძე რომელიც შეხვდა საირმის, ჭელას, და მოხის მოსახლეობას. სოფელ საირმეში ამომრჩეველთან შეხვედრისას, მათ ავტომობილი დაჰყვებოდათ, რომელშიც „ქართული ოცნების“ შტაბის თანამშრომელი, მიშიკო ბოჭორიშვილი, აბასთუმნის ტერიტორიული ორგანოს წარმომადგენლის მოადგილე, გიორგი გედევანიძე და საკრებულოს დეპუტატი, შმაგი გავაშელი ისხდნენ. მათ შეხვედრისთვის ხელის შეშლა სცადეს და ლანძღვა დაიწყეს. ისინი ენმ-ის წარმომადგენლებს სხვა სოფლებშიც დაყვებოდნენ“, – ვკითხულობთ ანგარიშში.

როგორც ISFED-ს პარუნაშვილიმა განუცხადა, მას სოფელ მოხეში ამომრჩეველთან შეხვედრისას აღნიშნულმა პირებმა შეურაცხყოფა მიაყენეს.
„სამართლიანი არჩევნების“ დამკვირვებელთან სატელეფონო საუბრისას გიორგი გედევანიძე ამბობს, რომ ის მოხეში საქმეზე მიდიოდა და გზად, სოფელ საირმეში შეხვედრას შეესწრო. ის გაჩერდა რათა გაეგო შეხვედრის მიზანი. შეხვედრაზე ყოფნას ადასტურებს შმაგი გავაშელიც. მისი თქმით, ის შეხვედრაზე იმ მიზეზით იმყოფებოდა, რომ გაეგო რამდენი ადამიანი დაესწრებოდა. ორივე მათგანი რაიმე ფორმით დაპირისპირებას უარყოფს. მიშიკო ბოჭორიშვილი შეხვედრებზე ყოფნის ფაქტს უარყოფს“, – ნათქვამია ანგარიშში.

სამართლიანი არჩევნებისა და დემოკრატიის საერთაშორისო საზოგადოებამ 2016 წლის 8 ოქტომბრის საპარლამენტო არჩევნების წინასაარჩევნო პერიოდის მონიტორინგის მეოთხე შუალედური ანგარიში დღეს, 3 ოქტომბერს გამოაქვეყნა. ანგარიში 2 სექტემბრიდან 1 ოქტომბრამდე პერიოდს მოიცავს. ამ პერიოდის განმავლობაში ორგანიზაციის დამკვირვებლები საარჩევნო სუბიექტების მიერ გამართულ 643 საჯარო შეხვედრას დაესწრნენ.

ორგანიზაციის დაკვირვებით, საანგარიშო პერიოდში გამოვლინდა სამსახურიდან სავარაუდოდ პოლიტიკური ნიშნით გათავისუფლების 3; ზეწოლა მუქარის 11; ადმინისტრაციული რესურსის გამოყენების 12; კამპანიისთვის ხელის შეშლის 8; ფიზიკური დაპირისპირების 6; ამომრჩევლის სავარაუდო მოსყიდვის 4; პარტიული ოფისის დაზიანების 2; სააგიტაციო მასალების დაზიანების 37; სიძულვილის ენის გამოყენების 4; არაუფლებამოსილი პირის მიერ აგიტაციაში მონაწილეობის 8 ფაქტი.

[ნინო ნარიმანიშვილი, ახალციხე]