ახალქალაქის საოლქო კომისიის წევრი:‘თავმჯდომარემ ფიზიკური და სიტყვიერი შეურაცხყოფა მომაყენა’

ამის შესახებ გაერთიანებული ოპოზიციის წარმომადგენლებმა საგანგებო ბრიფინგი გამართეს. მათ ახალქალაქის საოლქო საარჩევნო კომისიის თავმჯდომარე და რეგიონში პოლიციის უფროსის მოადგილე ზეწოლაში დაადანაშაულეს.

„გუშინ, ახალქალქის საოლქო კომისიაში სიტყვიერი და ფიზიკური შეურაცხყოფა მოგვაყენა, მე და გაერთიანებული ოპოზიციის ‘ძალა ერთობაშია’ წარმომადგენელს, არტურ მკოიანს, ახალქალაქის საოლქო საარჩევნო კომისიის თავმჯდომარემ ჰასმიკ მარანგოზიანმა. მსაგვსი შეურაცხყოფა უკვე რამდენჯერმე მოხდა. მარანგოზიანი მოითხოვდა ჩემგან, რომ რუსულ ან სომხურ ენაზე მესაუბრა. ქართულ ენაზე ჩემი ყველა რეკომნდაცია და დასმული შეკითხვა იყო იგნორირებული. მარანგოზიანმა ძალისმიერი მეთოდებით გამომაძევა სამუშაო სივრციდან. ასე შეზღუდეს ჩემი როგროც კომისიის წევრის უფლება“, – აცხადებს ახალქალაქის საოლქო საარჩევნო კომისიაში გაერთიანებული ოპოზიციის „ძალა ერთობაშია“ წევრი თეონა ჭალიძე.

მან საოლქო კომისიაში პოლიცია გამოიძახა: „გადამიყვანეს ახალქალაქის პოლიციაში, სადაც გამესაუბრა სამცხე–ჯავახეთის პოლიციის დეპარტამენტის უფროსის მაოდგილე გივი სიხარულიძე. გასაუბრება შედგა მის კაბინეტში, სადაც დამახვედრეს ცეცხლსასროლი იარაღი, ჩემს წინ განთავსებული იყო პისტოლეტი, ასევე განთავსებული იყო ჩემს მარჯვნივ საბრძოლო ცეცხლსასროლი ავტომატი და მჭიდები. რამაც ჩემზე ნეგატიური გავლენა იქონია. ამის თაობაზე გენერალურ ინსპექციასაც ვაცნობეთ. მიმაჩნია, რომ ეს გარემოება შექმნეს ჩემზე და არტურ მკოიანზე ზემოქმედების მიზნით“.

შინაგან საქმეთა სამინისტროში აცხადებენ, რომ მომხდართან დაკავშირებით ვითარებას სწავლობენ და დეტალებზე მოგივანებით ისაუბრებენ.
ახალქალაქის საოლქო კომისიასა და ასევე ცესკოში „სამხრეთის კარიბჭეს“ სატელეფონო ზარებს არ პასუხობენ.

[sknews.ge]