სანატორიუმის ძველ შენობაში მცხოვრები 80 ოჯახი სამინისტროსგან რეაგირებას ყოველდღე ელოდება. დევნილებს დახმარების იმედი მას შემდეგ გაუჩნდათ, რაც მათი მდგომარეობით საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს შიდა ქართლისა და სამცხე-ჯავახეთის ტერიტორიული ორგანო დაინტერესდა.
„სამინისტროს დავალებით სანატორიუმ „ლიკანში“ ჩავედით. შენობას ფოტოები გადავუღეთ და სამინისტროში ჩავიტანეთ. მინისტრს იქ არსებული მდგომარეობა სიტყვიერადაც აუხსენი“, - ამბობს სამინისტროს შიდა ქართლისა და სამცხე-ჯავახეთის ტერიტორიული ორგანოს უფროსის მოვალეობის შემსრულებელი თამაზ გვიმრაძე.
რა ბედი ელით დევნილებს, რომლებიც ავარიულ შენობაში გამოსახლების შიშით ცხვორობენ, ამის გარკვევა ლტოლვილთა და განსახლების სამინისტროში დღეს ‘სამხრეთის კარიბჭემაც’ სცადა. როგორც სამინისტროს პრესსამსახურში განგვიცხადეს, წლის ბოლომდე მათ ახალ შენობაში შეასახლებენ.
„მუნიციპალური განვითარების ფონდი გეგმავს ბორჯომის ყოფილი სამშობიაროს რეაბილიტაციას. ამ შენობას შევტავაზებთ დევნილებს“, - გვიპასუხა პრესსამსახურის უფროსმა ეკა გულუამ.
ბორჯომში მცხოვრები დევნილების ბედით, Sknews.ge-ზე
გამოქვეყნებული მასალის შემდეგ, ადამიანის უფლებათა დაცვის კომიტეტიც დაინტერესდა. დევნილების დახმარების თხვონით სამინისტროს აღნიშნულმა კომიტეტმაც მიმართა.
სტატია სათაურით ‘დევნილების გაუსაძლისი ცხოვრება’ ლიკანში sknews.ge-ზე 15 ივნისს გამოაქვეყნდა. სტატიის გამოქვეყნებიდან რამდენიმე დღეში ადამიანის უფლებათა დაცვისა და სამოქალაქო ინტეგრაციის კომიტეტის თავჯდომარემ ეკა ბესელიამ დევნილების შესახებ დეტალური ინფორმაცია მოგვთხოვა.
24 ივნისს ‘სამხრეთის კარიბჭემ’კომიტეტის თავჯდომარეს ამ თემაზე ვრცელი ინფორმაცია გაუგზავნა. 27 ივნისს კი კომიტეტმა ვრცელი წერილით საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს მიმართა.
კომიტეტი სამინისტროს ლიკანში მცხოოვრები 80 ოჯახის საცხოვრებელი ფართით ან კომპენსაციით დაკმაყოფილებას სთხოვს.
„მე, როგორც ბორჯომის მაჟორიტარი დეპუტატი, პირადად ვიცნობ მათ პრობლემებს. ნამდვილად გაუსაძლისია ის ვითარება, სადაც დევნილებს უწევთ ცხოვრება. სანატორიუმში არ არის ელემენტარული პირობები. დევნილებს არააქვთ სასმელი წყალი, გაზი, მოუწესრიგებელია ელექტროგაყვანილობა, სხვა ინფრასტრუქტურის მოწყობაზე კი საუბარი ზედმეტია. გთხოვთ, სათანადო ყურადღებას და რეაგირებას, რათა დევნილები დაკმაყოფილდნენ კეთილმოწყობილი საცხოვრებელი ფართებით ან შესაბამისი, კუთვნილი კომპენსაციით“, - ნათქვამია წერილში, რომელსაც ბორჯომის მაჟორიტარი დეპუტატი „ქართული ოცნებიდან“, კომიტეტის თავმჯდომარის პირველი მოადგილე გედევან ფოფხაძე აწერს ხელს.
დევნილები წერილს კომიტეტიდანაც ელოდებიან.
„როგორც კომიტეტიდან გვაცნობეს, როგორც კი სამინისტროსგან წერილს მიიღებენ, ასლს ჩვენც გადმოგვიგზავნიან“, - ამბობს გივი როსტობაია.
დევნილებმა სიტყვიერი დაპირება ბორჯომის მუნიციპალიტეტის გამგეობისგანაც მიიღეს. ადგილობრივმა ხელისუფლებამ დევნილებს შენობის მესაკუთრის შესახებ უნდა აცნობოს.
„რამდენიმე დღის წინ ბორჯომის გამგებელთან ისევ მივედი. მითხრა, რომ კორპუსის მფლობელის ვინაობას გარკვეული მიზეზების გამო ვერ ასახელებს. თუმცა, დამპირდა, რომ ახლო მომავალში გვეტყვის“, -ამბობს როსტობაია.
შეგახსენებთ, სანატორიუმის ოთხსართულიან კორპუსში, აფხაზეთიდან და სამაჩაბლოდან დევნილი, 80 ოჯახი ცხოვრობს. 1937 წელს აშენებული შენობა ავარიულ მდგომარეობაშია. პირველ სართულზე ცხოვრება შეუძლებელია. დევნილებს საცხოვრებელი პირობები მეორე სართულზეც აღარ აქვთ. რამდენიმე ოთახს იატაკი და ჭერი, ფაქტობრივად, აღარ აქვს.
[მანანა სარაშვილი, ახალციხე]