დევნილებს გამოსაზამთრებლად 200-ლარიანი ვაუჩერები გადაეცემათ

ლტოლვოლთა სამინისტრო დევნილების ზამთრის სეზონში სათბობი საშუალებით უზრუნველყოფისთვის 4 700 000 ლარს დახარჯავს. შესაბამისი ხელშეკრულება საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ სს „ლიბერთი ბანკთან“ გააფორმა.

აქცია იმ ოჯახებს შეეხებათ, რომლებიც საქართველოს შრომის, ჯანმრთელობისა და სოციალური დაცვის სამინისტროს, სოციალურად დაუცველი ოჯახების მონაცემთა ერთიან ბაზაში არიან რეგისტრირებული და მათი სარეიტინგო ქულა 70 001-ზე ნაკლებია.

სამინისტროს ინფორმაციით, ასეთი ოჯახების რაოდენობა 23 000-ზე მეტია. მათ ზამთრის პერიოდისათვის მოხმარებული ელექტროენერგიისა და ბუნებრივი აირის საფასურის დასაფარად 200 ლარიანი ბარათები გადაეცემათ.

დევნილებს ბარათების მიღება „ლიბერთი ბანკის“ ოფისებში შეუძლიათ. თანხა მათ
აუცილებლად ბუნებრივი აირის ან ელექტროენერგიის საფასურის გადასახდელად უნდა გამოიყენონ.

დევნილ ოჯახებს, შესაბამისი ელექტრონული ბარათის მიღება 2013 წლის 20 ნოემბრიდან 2014 წლის 1 მარტამდე შეეძლებათ.

[SKnews.ge]