ახალქალაქში 82 წლის ქალი დახმარებას ითხოვს

„შარშანწინ ვიყავი მისული სოციალური მომსახურების სააგენტოში, მითხრეს, რომ მარტო არ ვცხოვრობ, ვიღაცა მყავს და დახმარება არ გეკუთვნისო. საიდან მოიგონეს არ ვიცი. გათხოვილი არ ვყოფილვარ და არც შვილები მყავს“, – გვეუბნება ვარტანუშ გაბრიელიანი.

მისი თქმით, პენსია წამლებსა და საკვების საყიდლად არ ყოფნის: „იატაკიდან სიცივე ამოდის, ჭერი დაზიანებულია წყალი ჩამოდის და კედლები სველდება. სახლს ვერ ვათბობ“.

სოციალური მომსახურების სააგენტოს ახალქალაქის რაიონული განყოფილების უფროსი, იროდიონ გოგოლაძე ამბობს, რომ გაბრელიანი სოციალურ დახმარებას მაღალი ქულების გამო ვერ იღებს.

„ეგ ქალბატონი ჩემთან არ მოსულა. რაც შეეხება მის ქულებს, ბოლო გადამოწმების დროს 72 800 ქულა ჰქონდა. წელიწადში ერთხელ ხდება ოჯახის შემოწმება, ვარტანუშს შეუძლია 2020 წლის ცხრა აგვისტოს მერე მოვიდეს და განცხადება ხელახლა დაწეროს. თუ მაღალ ქულებს იღებს ჩვენ როგორ დავეხმარებით?! კომპიუტერი ითვლის ქულებს“, – ამბობს იროდიონ გოგოლაძე.

[რიმა სარუხანიან, ახალქალაქი]