ახალციხეში ოთხსულიან ოჯახს სახლი ენგრევა [ფოტო]

„ნახეთ რა დღეში ვართ. მარტო პენსიას ვიღებთ მე და ჩემი მეუღლე, სხვა შემოსავალი არ გვაქვს. ჭერიდან თავზე გვაცვივა ყველფერი, იატაკი დალპა და ჩავარდა. წვიმა რომ მოდის საშინელი მდგომარეობაა, ყველგან წყალი ჩამოდის, თასები გვიდგას“, – ამბობს 72 წლის სერგო ბაღდასაროვი.

ამბობს, რომ მისი და მეუღლის პენსია წამლების და საკვების საყიდლად არ ჰყოფნით, ამიტომ იძულებულია დახმარება ითხოვოს: „არ ვიცი როგორ მოვიქცეთ, კრედიტი რომ ავიღო ვერ გადავიხდი. ავადმყოფი ვარ, ორი ოპერაცია მაქვს გაკეთებული ხერხემალზე, წამლებში და ექთნის მომსახურებაში მიმდის მთელი ფული. ამ პრობლემების მოგვარებას წელია ვითხოვ, გია კოპაძესაც [ახალციხე–ადიგენის მაჟორიტარი დეპუტატი პარლამენტში] კი ვაწუხებდი“.

ბაღდასაროვების ოჯახი უსახსრობის გამო ახალციხის "სათნოების სახლში" იკვებება: „ახლაც მივმართე, მაგრამ მითხრეს პანდემიის პირობებში ვერაფერს გააკეთებთო“.

ბოლო წერილი ბაღდასაროვებმა მერიიდან 2019 წლის 12 დეკემბერს მიიღეს, სადაც წერია, რომ 2019 წლის ბიუჯეტიდან სოციალური დახმარების გაცემის წესი, კერძო მფლობელობაში არსებული ობიექტების შესაკეთებლად, საშენი მასალების გამოყოფას არ ითვალისწინებს.

„სამხრეთის კარიბჭეს“ ახალციხის მერიაში განუცხადეს, რომ ბაღდასაროვების ბინაში არსებულ მდგომარეობას შეისწავლიან და ამის შემდეგ გადაწყდება რით დაეხმარებიან ავარიულ სახლში მცხოვრებ ოჯახს.

„შესწავლის შემდეგ შესაძლებლობის ფარგლებში გაეწევათ დახმარება. გასულ წელს ახალციხის მერიისა და წყალმომარაგების კომპანიის ერთობლივი თანამშრომლობით აღნიშნულ ოჯახს წყლისა და საკანალიზაციო სისტემების პრობლემა სრულად მოუგვარდა. 2018 წელს კი 63 ცალი გოფრირებული თუნუქის ფურცელი გადავეცით“, - გვითხრეს მერიაში.





[მარიამ ბარძიმაძე,ახალციხე]