ენმ–ს წევრებმა სამცხე–ჯავახეთის ექვსი ოლქიდან ოთხში სხდომები დატოვეს

ასპინძაში, ახალციხეში, ნინოწმინდასა და ახალქალაქში ოპოზიციური პარტიების წარმომადგენლებს საუბნო კომისიების წევრების არჩევნებში მონაწილეობა არ მიუღიათ.

ასპინძის საოლქო კომისიაში სხდომის მიმდინარეობისას „ევროპული საქართველოს“ წევრმა ნანა ხუციშვილმა და „ერთიანი ნაციონალური მოძრაობის“ წევრმა ელენე მოსიძემ სხდომა პროტესტის ნიშნად დატოვეს.

„წინა სხდომაზე წამოვაყენე ინიციატივა გასაუბრებით შეგვერჩია წევრები, რაზეც მხარი არ დამიჭირეთ. მე ასე ვერავის ავირჩევ მხოლოდ სახელებით და გვარებით“,– განაცხადა მოსიძემ.

მის პოზიციას იზიარებს ხუციშვილიც: „პირები ვისაც განცხადებები აქვთ შემოტანილი ზოგი თანამდებობის პირია, ზოგი მათი ნათესავია, ზოგი კი „ოცნების“ აქტივისტია. მსგავსი კანდიდატებით დაკომპლექტება არ მოგვცემს მიუკერძოებელი არჩევნების ჩატარების საშუალებას“.

სხდომა ნინოწმინდაში „ნაციონალური მოძრაობის“ წევრმა მანუჩარ ფანგანმა დატოვა. მან ერთ–ერთი კონკურსანტის მიერ დოკუმენტზე რუსული ხელმოწერა გააპროტესტა.

ახალციხის ოლქში არჩევნებში მონაწილეობა არ მიიღო „ნაციონალური მოძრაობის“ წევრმა ანა ბერიძემ. მან თქვა, რომ კონკურსანტების შესახებ კომისიის სხვა წევრებთან ერთად არ უმსჯელია, ამიტომ გადაწყვეტილების მიღებაც არ შეუძლია.

ბერიძესთან ერთად ახალციხის საოლქო კომისიის სხდომაზე პროტესტი გამოთქვა „საქართველოს ქრისტიან კონსერვატიული პარტიის“ წარმომადგენელმა მარიამ გვირჯიშვილმაც. მისი თქმით, სიები კომისიას წინასწარ აქვს მიღებული და ამის შესახებ წერილობით განცხადებას ოლქში ხვალ, 12 სექტემბერს შეიტანს.

არჩევნებში მონაწილეობა არ მიუღია ახალქალაქის ოლქში „ერთიანი ნაციონალური მოძრაობის“ წევრსაც.

ოლქების ნაწილში სხდომები დასრულდა, ნაწილში კი ამ დრომდე მიმდინარეობს.

ბორჯომის ოლქში „ევროპელების“ წარმომადგენელი ლელა შუბითიძე ამბობს, რომ კომისია „ოცნების“ წევრებით კომპლექტდება.

„კომისიის წევრებმა არ აირჩიეს და გამოტოვეს ისეთი კონკურსანტები, რომლებიც პროფესიონალები, გამოცდილები და ნეიტრალურები არიან“, – ამბობს ბორჯომის საოლქო კომისიაში „ერთიანი ნაციონალური“ მოძრაობის წარმომადგენელი ბაკურ გელაშვილი.

[მარიამ ბარძიმაძე, ახალციხე]