ბორჯომის საოლქო კომისიამ განცხადება-საჩივრების განხილვა დაასრულა

ბორჯომის საოლქო საარჩევნო კომისიაში განცხადება-საჩივრების განხილვამ ხმაურის ფონზე ჩაიარა.

კომისიაში შესული 18 საჩივრიდან ზოგი ნაწილობრივ დაკმაყოფილდა, ზოგს უარი ეთქვა, ზოგი კი საერთოდ არ განუხილავთ. N36-ე ბორჯომის საოლქო კომისიის თავმჯდომარის ლევან დევიძის განმარტებით, საჩივრები ძირითადად საუბნო კომისიის წევრებზე დისციპლინარული პასუხისმგებლობის ნაწილში დაკმაყოფილდა.

იმ საუბნო კომისიის წევრებმა, ვისთან მიმართებაშიც საოლქოში საჩივრები შევიდა შენიშვნები მიიღეს. ორ მათგანს გაფრთხილება აქვს, ორს კი, იმის გამო, რომ კენჭისყრის დღეს უბანზე არ იმყოფებოდნენ, ხელფასიდან თანხა დაექვითებათ.

„ძირითადად მსუბუქი სასჯელებით შემოვიფარგლეთ, განსაკუთრებული დარღვევები,რამაც საარჩევნო პროცესებზე დიდი გავლენა მოახდინა, არ იკვეთებოდა“, - ამბობს ლევან დევიძე.

მისივე თქმით, კომისიას არ განუხილავს ის განცხადებები, რომლებიც საოლქო კომისიაში არაუფლებამოსილმა პირებმა შეიტანეს: „საჩივრის ან განცხადების დაწერის უფლება აქვს საარჩევნო უბანზე მყოფ დამკვირვებელს ან პოლიტიკურ სუბიექტს და არა სხვა მოქალქეს“.

საოლქო კომისიაში ხმაური მოჰყვა, #45-ე ოლქში შემავალ ახალქალაქის ექვს უბანზე დაფიქსირებული დარღვევების შესახებ „ნაციონალებისა“ და „ლეიბორისტების“ საჩივრებს. ორივე განცხადებელი უბნების ხელახლა გადათვლასა და შედეგების ბათილად ცნობას ითხოვდა, აღნიშნული კომისიამ არ დააკმაყოფილა.

„ეს არ იყო არგუმენტებით გამყარებული პოზიცია, ეს იყო უბრალოდ სამართლებრივი პროცესების პოლიტიკასთან მიბმული მცდელობა, სხვა არაფერი. ამიტომ, არ დააკმაყოფილა კომისიამ“, - ამბობს ლევან დევიძე.

სხდომა „ნაციონალური მოძრაობის“ წევრმა და „ლეიბორისტების“ დეპუტატობის კანდიდატმა გიორგი გიუაშვილმა პროტესტის ნიშნად დატოვეს.

„ყველაზე სერიოზული დარღვევები მე–17 უბანზე იყო, პირველ რიგში ამის გადათვლა არ მოისურვა კომისიამ და უარი გვეთქვა. დანარჩენებზე უკვე ვიცოდით რა პასუხი იქნებოდა. სხდომაზე დარჩენას აზრი აღარ ჰქონდა, თან თავმჯდომარე ძალიან მიკერძოებული იყო“, -გვითხრა გიოირგი გიუაშვილმა.

გაასაჩივრებს თუ არა გიუაშვილი სასამართლოში აღნიშნულს, ამას მაშინ გადაწყვეტს, როდესაც საოლქო კომისიის განკარგულება ჩაჰბარდება.
„ლეიბორისტებისგან“ განსხვავებით, ბორჯომის საოლქო კომისიის გადაწყვეტილების გასაჩივრებას აპირებენ „ნაციონალურ მოძრაობაში“.

„უკვე გადაწყვეტილია, საჩივრას სასამართლოში ხვალ შევიტანთ“, -განცხადა „ნაციონალური მოძრაობიდან“ ასპინძა-ბორჯომში დეპუტატობის კანდიდატმა ტარიელ ლონდარიძემ.

[ლუბა გიორგაძე, ბორჯომი]