'წინასწარ იცით ვინ უნდა აირჩიოთ' - ახალციხეში საუბნო კომისიების არჩევნები პროტესტით დაიწყო

#37 ახალციხის საოლქო კომისიაში კენჭისყრის დაწყებამდე ნაციონალების წევრმა ანა ბერიძემ განაცხადა, რომ მას კომისიის სხვა წევრებთან ერთად საუბნო კომისიის წევრების განცხადებები არ განუხილავს, ამიტომ არჩევნებში მონაწილეობას ვერ მიიღებს: "არ ყოფილა ჩვენს შორის აზრთა გაცვლა–გამოცვლა, ასე ვერც სუბიექტურ და ვერც ობიექტურ გადაწყვეტილებას ვერ მივიღებ და ვტოვებ სხდომას".

ახალციხის საოლქო კომისიის თავმჯდომარის შეკითხვაზე, ჰქონდა თუ არა მას წვდომა საუბნო კომისიის წევრების განაცხადებზე, ბერიძემ უპასუხა, რომ კი.

"გადაწყვეტილება თქვენ უნდა მიიღოთ დამოუკიდებლად, ისე როგორც ეს თქვენ მიგაჩნიათ სწორად, არჩევნები ამიტომ იმართება", - უთხრა ბერიძეს თეა გავაშელმა.

მიუხედავად კომისიის სხდომის თავმჯდომარის განცხადებისა, ბერიძემ სხდომა დატოვა.

ამის შემდე, სიტყვის უფლება საოლქო კომისიაში "საქართველოს ქრისტიან კონსერვატიული პარტიის" წარმომადგენელმა მარიამ გვირჯიშვილმა ითხოვა: "სიებია მოსული წინასწარ ვინც უნდა აირჩიოთ, ამიტომ მეც ვტოვებ სხდომას. ხვალ კი ამ ყველაფერთან დაკავშირებით, განცხადებას შემოვიტან".

"ჩვენ არ ვიცით ვინ უნდა ავირჩიოთ და თქვენ რა იცით?! ნება თქვენია", - უთხრა გვირჯიშვილს გავაშელმა.

მისივე განცხადებით, სხდომაზე ქვორუმი, კომისიის 11 წევრი დარჩა და ამიტომ არჩევნები ჩვეულებრივ გაგრძელდება.
ახალციხის საოლქო კომისია 35 საარჩევნო უბანში 6-6 წევრს ირჩევს. სხდომის მიმდინარეობას დამკვირვებლები ესწრებიან "დემოკრატიული ინიციატივა საერთაშორისო ცენტრიდან" და "სამართლიანი არჩევნებიდან".



[თამუნა უჩიძე, ახალციხე]