‘სიები უდევთ წინ და იწერენ’ – ბორჯომის ოლქში სხდომა სამმა დამკვირვებელმა დატოვა [Video]

პრეზიდენტობის კანდიდატის გრიგოლ ვაშაძის წარმომადგენელმა ნინო ხაჩიძემ, „ნაციონალური მოძრაობის“ წარმომადგენელმა ბაკურ გელაშვილმა და „ევროპული საქართველოს“ წარმომადგენელმა ბაქარ შირაძემ ბორჯომის საოლქო კომისიის სხდომათა დარბაზი რამდენიმე წუთის წინ დატოვეს.

„სიები უდევთ წინ და იწერენ. წინასწარ „ოცნებამ“ მიაწოდა მათ იმ პირების ჩამონათვალი, ვინც უბნებზე უნდა აირჩიონ და ამის მიხედვით ხელმძღვანელობენ. ამიტომაც სულ მმართველი პარტიის წარმომადგენლების ახლობლები ინიშნებიან უბნებზე“, – აცხადებენ ოპოზიციური პარტიების წარმომადგენლები.

საუბნო კომისიის წევრების არჩევისას სიით სხდომაზე „ქართული ოცნების“ წევრი მანანა ორჯონიკიძე ხელმძღვანელობს. იგი აცხადებს, რომ მის გარშემო გაჩენილ შეკითხვებს სხდომის დასრულების შემდეგ უპასუხებს.



თუმცა, მხოლოდ ეს არაა მიზეზი, რის გამოც ოპოზიციური პარტიების წარმომადგენლებმა სხდომა დატოვეს. მათი თქმით, კომისიის თავმჯდომარე ლევან დევიძე იმ პირებს, ვისაც კრიტიკული მოსაზრება აქვს სიტყვის უფლებას არ აძლევს.

„მთავარია რეგლამენტში ჩაეტიოთ, ის რასაც ამბობთ ოქმში აუცილებლად დაფიქსირდება, სხვანაირად მოქცევის უფლებას კანონი არ მაძლევს“, – უთხრა მათ სხდომაზე დევიძემ.

ბორჯომში – შესული სულ 273 განაცხადია 180 წევრი უნდა შეარჩიონ.

შეგახსენებთ, რომ დღეს, 11 სექტემბერს, სამცხე–ჯავახეთის ექვსი საარჩევნო ოლქიდან ოთხში საუბნო საარჩევნო კომისიების წევრების არჩევისას სხდომები „ნაციონალური მოძრაობისა“ და „ევროპული საქართველოს“ წევრებმა დატოვეს.

[sknews.ge]