თეონა ბერიძე: ‘თავსაბურავით სიარულის აკრძალვა მუსლიმი ქალის დისკრიმინაციაა’

„ჩემთვის ეგ ძალიან გულსატკენი ამბავია. მე მუდამ თავსაბურავით ვაპირებ სიარულს. ჩვენც ხომ ადამიანები ვართ და გვაქვს უფლება როგორც გვსურს ისე ვიაროთ ქუჩაში?! თავსაბურავით სიარულის აკრძალვა მუსლიმი ქალის დისკრიმინაციაა“, – ამბობს თეონა ბერიძე, რომელსაც ორი წლის წინ, ადიგენში, სოფელ მოხის სკოლაში თავსაფრით სიარულს უშლიდნენ.

თეონამ სკოლა დაამთავრა და სწავლა აჭარის საგანმანათლებლო კოლეჯში ინფორმაციულ ტექნოლოგიებზე გააგრძელა. ხუთი თვის წინ კი ბათუმში გათხოვდა: „თავსაბურავი არასდროს მომიხდია და არც ვაპირებ, ქორწილშიც თავზე მეფარა. ეს მოხეს სკოლის შემდეგ ჩემთვის არც არავის მოუთხოვია, პირიქით ბათუმში მოსწონდათ კიდეც“.

ამბობს, რომ ის დღეები, როცა სკოლაში თავსაფრის ტარების აკრძალვასთან დაკავშირებით აქციები იმართებოდა, არც თუ ისე სასიამოვნოდ ახსენდება: „სოფლიდან კი წამოვედი, მაგრამ ჩემი დები იქ ცხოვრობენ და სულ ვკითხულობ მსგავსი რამ კიდევ ხომ არ ხდება, მაგრამ მეუბნებიან, რომ ჩემს მერე სკოლაში ასეთი რაღაცა აღარ მომხდარა და მიხარია“.

რა შეცვალა მოხის თემში მისმა მაგალითმა ამაზე არ უფიქრია, თუმცა, იმაში დარწმუნებულია, რომ თავისუფალ ქვეყანაში ყველა ადამიანს თავისუფლად ჩაცმის უფლება უნდა ჰქონდეს და ამის კანონით აკრძალვა დაუშვებელია.

თეონა ამბობს, რომ სამომავლოდ კულინარიის სწავლა უნდა და ამაში ახალი ოჯახიც დაეხმარება: „მინდა რომ მზარეულად ვიმუშაო დიდ სასტუმროებში. ეს სფერო მაინტერესებს და ვფიქრობ კარგადაც გამომივა“.

თეონა ბერიძეს სოფელ მოხის სკოლის დირექტორმა თავსაბურავის ტარება 2016 წლის დეკემბერში მოსთხოვა. გოგონა მაშინ მობილობის სისტემით სასწავლებლად ბათუმიდან გადმოვიდა. დირექტორის ამ მოთხოვნას თეონას თანაკლასელების პროტესტი მოჰყვა. საბოლოოდ განათლების სამინისტრომ მოხეში მუსლიმი მოსწავლის დისკრიმინაციის ფაქტი ვერ დაადგინა.

საქართველოს პარლამენტში 4 სექტემბერს დარეგისტრირდა კანონპროექტი, რომელიც საჯარო სივრცეში ჩადრით, ნიქაბით და ბურკით გამოჩენას კრძალავს.თუ კანონპროექტი 51 დეპუტატის მხარდაჭერას მოიპოვებს და პარლამენტი დაამტკიცებს, საზოგადოებრივ ტრანსპორტში, პარკებში და სხვა საჯარო ადგილებში ჩადრით, ნიქაბით და ბურკით გამოჩენა ადმინისტრაციულ სამართალდაღვევათა კოდექსის მიხედვით, თავდაპირველად 500 ლარით, განმეორებით შემთხვევაში კი 1 500 ლარით დაჯარიმებას გამოიწვევს.

[ლუბა გიორგაძე, ადიგენი]