მოხეს სკოლის მოსწავლეებმა განათლების სამინისტროს წერილობით მიმართეს

მოხეს საჯარო სკოლის იმ მუსლიმმა მოსწავლეებმა, რომლებიც სკოლის დირექტორს დისკრიმინაციაში ადანაშაულებენ, განათლების სამინისტროს აქ მომხდარის შესწავლა წერილობით სთხოვეს.

„ყველაფერი დავწერეთ რაც იყო, მოვყევით ამ ფაქტის მერე როგორ განვითარდა მოვლენები და ხელიც მოვაწერეთ. სამინისტრო ითხოვდა, რომ წერილობით მიგვემართა და ასეც გავაკეთეთ. იმედია შეისწავლიან მომხდარს და ყველაფერი სამართლიანად გადაწყდება“, – ამბობს მოხეს საჯარო სკოლის მოსწავლე თეონა ბერიძე.

მოსწავლეების წერილი სამინისტროში 3 ინავარს „ადამიანის უფლებების სწავლებისა და მონიტორინგის ცენტრის“ წარმომადგენელი თამთა მიქელაძემ შეიტანა.

შეგახსენებთ, მოხის სკოლის მეოთორმეტე კლასის მოსწავლეები ამბობენ, რომ მოხის სკოლაში გოგონას დირექტორმა თავსაფრის ტარება დაუშალა. მათი თქმით, თავსაფრის მოხდა სკოლის დირექტორმა ნათია რეხვიაშვილმა თეონა ბერიძეს მოსთხოვა. გოგონამ ერთი სემესტრი ბათუმში, №27 საჯარო სკოლაში ისწავლა და ახლა მობილობით მოხის სკოლაში ბრუნდებოდა. დირექტორმა კი უთხრა რომ სკოლაში იმ შემთხვევაში მიიღებდა, თუ თავსაბურავს მოიხდიდა. მათივე განცხადებით, დირექტორმა გოგონა სკოლაში მიიღო, თუმცა, მისდამი სოლიდარობისა და დირექტორის ქმედებისადმი პროტესტის ნიშნად, დღეს, 23 დეკემბერს, მოხის სკოლაში, მეთორმეტეკლასელი სხვა მუსლიმი გოგონებიც თავსაფრებით მივიდნენ.

ამის შემდეგ კი მოსწავლეებმა სკოლის ეზოში საპროტესტო აქციები გამართეს იმ მოთხოვნით, რომ სკოლის დირექტორი ნათია რეხვიაშვილი გაეთავისუფლებინათ. აქციებიდან მესამე დღეს სკოლაში პრეზიდენტის მრჩეველი და განათლების სამინისტროს წარმომადგენლები მივიდნენ. სამინისტროს თანამშრომლებმა მოსწავლეებს პირობა მისცეს, რომ მომხდარს შეისწავლიან, თუმცა აქვე სთხოვეს, რომ ამასთან დაკავშირებით წერილობით მიემართათ. ამ პირობის შემდეგ მოსწალვეები გაკვეთილებზე დაბრუდნენ;

[sknews.ge]