მოხის სკოლის საქმეს განათლების სამინისტროს აუდიტი სწავლობს

სოფელ მოხეს საჯარო სკოლა.

დღეს დილიდან, აღნინული სამსახურის წარმომადგენლები მოხის სკოლაში იმყოფებიან. ამ დროისთვის ისინი, თეონა ბერიძეს ხვდებიან, მუსლიმ მოსწავლეს, რომელმაც თავსაბურავის გამო დირექტორისგან გაფრთხილება მიიღო.

მოხის საჯარო სკოლაში, შეხვედრა დაახლოებით ორ საათზე მეტია მიმდინარეობს. როგორც „სამხრეთის კარიბჭესთან“ მოხის სკოლის ერთ-ერთი მეთორმეტეკლასელი აცხადებს, აუდიტის სამსახურის წარმომადგენლები სკოლის დირექტორს, პედაგოგებსა და მის თანაკლასელს თეონა ბერიძეს ერთდროულად ხვდებიან.

„შეხვედრა კარგახანია მიმდინარეობს და არ ვიცი კონკრეტულად რა აინტერსებთ“, -გვითხრა ასლან მიქელაძემ.

შეგახსენებთ, რომ მოხის სკოლაში მუსლიმი მოსწავლეების პროტესტი მას შემდეგ დაიწყო, რაც მათივე თქმით, სკოლაში გოგონას დირექტორმა თავსაფრის ტარება დაუშალა. მიუხედავად იმისა, რომ დირექტორმა გოგონას მიმართ დისკრიმინაციული მიდგომა უარყო, სკოლის მუსლიმი მოსწავლეები რამდენიმე დღის განმავლობაში აქციებს მართავდნენ და ჯერ განათლების სამინისტროს ფაქტზე რეაგირებას, შემდეგ კი უკვე დირექტორის გადადგომას მოითხოვდნენ.

საკითხით დაინტერსედნენ და შესწავლა დაიწყეს, რელიგიურ უმცირესობების საკითხებზე მომუშავე არასამთავრობო ორგანიზაციებმა, სახალხო დამცველის აპარატმა და საქართველოს პრეზიდენტის ადმინისტრაციამ. მათი წარმომადგენლები მოხის სკოლის მოსწავლეებსა და პედაგოგებს შეხვდნენ კიდეც.

განათლების სამინისტრომ კი მუსლიმ მოსწავლეს განუცხადა, რომ თუ დისკრიმინაციის ნიშნები არსებობდა, აუდიტის სამსახურისათვის წერილობით მიემართა და საკითხს შეისწავლიდნენ.

მოხეს საჯარო სკოლის მოსწავლეებმა, დირექტორის მხრიდან შესაძლო დისკრიმინაციულ მოპყრობასთან დაკავშირებით, განათლების სამინისტროში წერილი მიმდინარე წლის 3 იანვარს შეიტანეს;

[ლუბა გიორგაძე, ადიგენი]