კონსტანტინე კუბლაშვილის განცხადებით ახალციხეში აქცია უმართავი იყო

კონსტანტინე კუბლაშვილი ახალციხის რაიონულ სასამართლოსთან დღეს გამართულ საპროტესტო აქციას გამოეხმაურა. მისი განცხადებით, აქცია უკონტროლო იყო და პოლიცია წესრიგს არ იცავდა.

„ახალ ციხის სასამართლოში რამდენიმე მანდატური გავაგზავნეთ, რომ სასამართლო დაცული ყოფილიყო, მაგრამ პოლიციის მხრიდან არანაირი რეაგირება არ ყოფილა, ისინი იდგნენ გვერდით და უყურებდნენ თუ როგორ ესროდნენ აქციის მონაწილეები სასამართლოს სხვადასხვა ნივთებს, მათ შორის ქვებს, ამის შედეგად ჩაამსხვრიეს სასამართლოს ფანჯარა და ერთ-ერთი თანამშრომელი სახის არეში დაშავდა,“-განაცხადა კუბლაშვილმა.

კუბლაშვილმა სამართალდამცავებს მოუწოდა გამოიძიონ ახალციხეში მომხდარი.

რაც შეეხება ხვედელიანის განაჩენს, „ყველამ კეთილი უნდა ინებოს და გაასაჩივროს ზემგდომ ინსტანციებში“ - განაცხადა კუბლაშვილმა.

შეგახსენებთ , ახალციხის რაიონული სასამართლოს შენობასთან დღეს ბორჯომის პოლიციის ყოფილი უფროსის მამუკა ხვედელიანისა და მასთან ერთად ახალგაზრდა მამაკაცის გაუპატიურებაში ბრალდებული კიდევ 4 პირის გათავისუფლება გააპროტესტეს.

ბორჯომის პოლიციის ყოფილი უფროსი, ასევე, ბორჯომის ყოფილი გამგებელი, „ერთიანი ნაციონალური მოძრაობის“ მაჟორიტარი კანდიდატი მამუკა ხვედელიანი და მისი 4 თანამშრომელი, ახალციხის რაიონულმა სასამართლომ 3 ივლისს უდანაშაულოდ სცნო და სასამართლო დარბაზიდან გაათავისუფლა.

"ბრალდების მხარის მიერ წარმოდგენილი მტკიცებულებები, რომლებიც გამოკვლეული იქნა სასამართლო სხდომაზე, არათუ არ შეესაბამებოდნენ ერთმანეთს და დაზარალებულთა ჩვენებებს, არამედ ხშირ შემთხვევაში გამორიცხავდნენ დაზარალებულთა მიერ მითითებულ ფაქტებს. ამასთან, ჩატარებული საგამოძიებო მოქმედებების (პირის ამოცნობის) ოქმები, რომლებიც მნიშვნელოვანი მტკიცებულება შეიძლება გამხდარიყო ბრალდების ნაწილში, შეუსაბამობაში მოდიოდა საგამოძიებო მოქმედების ამსახველ ვიდეოჩანაწერთან, რამაც მტკიცებულებები ეჭქვეშ დააყენა", - ასე ახსნეს განაჩენი ახალციხის რაიონულ სასამართლოში.

ამ განაჩენის გამო საპროტესტო აქციები მეორე დღიდან, 4 ივლისიდან დაიწყო. აქციის მონაწილეებმა ბორჯომში ცენტრალური მაგისტრალი გადაკეტეს. დღეს 5 ივლისს კი აქცია ახალციხეში გაიმართა. მონაწილეებმა სასამართლოს ცოცხები, კვერცხები და პომიდვრები დაუშინეს. სასამართლოს შესასვლელი კარი ცოცხით ამოქოლეს. აქციის მიმდინარეობისას გატყდა შენობის მეორე სართულის ფანჯარა. მომხდარის გამო დაზიანება მიიღო სასამართლოს თანამშრომელმა, სხდომის მდივანმა გიორგი ჩიტაშვილმა.

აქვე შეგახსენებთ, რომ მომხდარს გამოეხმაურნენ საქართველოს მთავარი პროკურატურა და უზენაესი სასამართლო. პროკურატურაში აცხადებენ რომ მოსამართლე პროკურორს საპროცესო გარიგებას სთავაზობდა, რაზეც უარი მიიღო, უზენაეს სასამართლოში ამ განცხადებას აბსურდულს უწოდებენ და ამბობენ, რომ საპროცესოს თავად პროკურატურა ითხოვდა.

[ნინო ნარიმანიშვილი, ახალციხე]