ბორჯომელები - ხვედელიანი შემოგვაკვდება

ბორჯომში ადგილობრივებმა საპროტესტო აქცია სილამაზის ხიდთან 12:00 საათზე დაიწყეს. ადგილობრივებმა, რომლებსაც „ქართული ოცნების“ წარმომადგენლებიც შეუერთდნენ, შეძახილებით: „დაისაჯონ დამნაშავეები“, „გათავისუფლდეს სასამართლო ნაციონალებისგან“, „ქვეყანაში სამართალი უნდა აღდგეს“, - გზა გადაკეტეს. აქცის მონაწილეებს შორის იყო დაზარალებული ვ.გ-ც.

მათი მთავარი მოთხოვნა ხვედელიანისა და მისი ყოფილი თანამშრომლების კვლავ ციხეში დაბრუნებაა. წინააღმდეგ შემთხვევაში, ამბობენ, რომ „მომხდარი მშვიდობით არ დასრულდება“.

„არ გვინდა, რომ ახალგაზრდები გაბოროტდნენ ქუჩაში. ვინც გადაეყრება ხვედელიანს, გული ვერავის მოუთმენს, ყოველ შემთხვევაში ჩვენ, ვინც აქ ვდგავართ, ამას ვერ ავიტანთ“, - ამბობს ბაკურიანელი გიორგი ხუბაევი.

იმაზე, რომ შესაძლოა ხვედელიანი ქუჩაში ვინმეს შემოაკვდეს, აქციის სხვა მონაწილეებიც საუბრობენ.

„ჩვენ თუ გავასამართლებთ ხვედელიანს, მერე კანონი ჩვენს წინააღმდეგ ხომ იქნება მძიმე და სამართლიანიც?! ჩვენ ხომ მოგვისჯიან 30 წელს?!“ - კითხულობს ბაკურიანელი დავით კაპანაძე.

მათი განცხადებით, გუშინ ხვედელიანი ბორჯომში იარაღით დადიოდა.

„არაერთმა დაინახა. წარმოიდგინეთ, რომ გაგიკეთონ უკანალში ეგეთი რაღაცა და მერე დაინახო ქუჩაში როგორ მოდის, აიტან?! ამას, ის ადამიანი, ვისაც ეს გაუკეთეს, მშვიდად ვერ შეხვდება. ქუჩაში გადაყრაზეა უკვე ლაპარაკი. თუ შემოაკვდათ ხვედელიანი, მერე მის მკვლელს ხომ მიუსჯიან 25 წელს?! ბორჯომში ომი დაიწყება“, - აცხადებს ხუბაევი.

აქციის მონაწილეების განცხადებით, ხვედელიანი არამხოლოდ მამაკაცის გაუპატიურების ბრძანების გაცემაში, არამედ ახალგაზრდების მკვლელობაშიცაა დამნაშავე.

„ოთხი ბიჭი მოკლა ხვედელიანმა. ხალხს ხოცავდა წიწილებივით და მაგას არავინ აპატიებს! უპატიებელი შეცდომები აქვთ დაშვებული და სასამრთლომ იგი მაინც გარეთ გამოუშვა“, - ამბობს გიორგი არბოლიშვილი. მისივე თქმით, ბორჯომის პოლიციაში ხალხს მასობრივად აწამებდნენ.

აქციის მონაწილეებს შორის იყო დაზარალებული ვ.გ -ც. იგი აცხადებს, რომ გაჩერებას არ აპირებს: „ბოლომდე ვიბრძოლებ, არ გავჩერდები! ასეთი ადამიანები გამოუშვეს ციხიდან და ამას მარტო მე კი არა, კიდევ ბევრი ვერ აიტანს“.

„ქართული ოცნების“ ბორჯომის რაიონული ორგანიზაციის თავმჯდომარის მოადგილის ზურაბ ხაჩიძის განცხადებით, ხვედელიანის ციხიდან გამოშვებით „ქართული ოცნების“ დისკრედიტაცია სცადეს: „მოსამართლემ ეს გადაწყვეტილება ზეწოლით მიიღო. ეს პიროვნება წლების განმავლობაში ამყოფებდა ხალხს ტერორში, სკამის ფეხით გაუპატიურების ბრძანება მან გასცა. ეს იცის მთელმა ბორჯომმა“, - აცხადებს იგი.

საპროტესტო აქცია 3 საათის განმავლობაში გაგრძელდა. ამ დროისთვის ბორჯომში გზა გახსნილია.

მომიტინგეები აქციის გამართვას ხვალ ახალციხის რაიონულ სასამართლოსთან აპირებენ.

[თამუნა უჩიძე, ბორჯომი]