კოპაძესა და მკოიანს პარლამენტში სიტყვით გამოსვლის უფლებით არ უსარგებლიათ

საქართველოს პარლამენტიდან გამოთხოვილი საჯარო ინფორმაციის მიხედვით, ახალციხე–ადიგენის მაჟორიტარი დეპუტატი გიორგი კოპაძემ 93 –დან 24 პლენარული სხდომა გააცდინა და აქედან ხუთი არასაპატიო მიზეზით. სამი წლის განმავლობაში კი დეპუტატს სიტყვით გამოსვლის უფლებით არასდროს უსარგებლია.

„118 კაციანი ფრაქციაა, განსაზღვრულია ვინ და როგორ უნდა გამოვიდეს და თავის აზრი გამოთქვას, ზოგჯერ არ რჩება ამის დრო. მე კომიტეტებზე ძალიან აქტიური ვარ, სადაც არის ამის საშუალება. ჩვენ ვმუშაობთ კანონებზე, რომელიც მუნიციპალიტეტებსაც და ყველა ადამიანს ხელს შეუწყობს. სულ ახლახანს ახალ ინიციატივას მოეწერა ხელი, რომლითაც სოციალური საწარმოები გაიხსნება“, – ამბობს „სამხრეთის კარიბჭესთან“ სატელეფონო საუბარში გიორგი კოპაძე.

პლენარულ სხდომებზე სიტყვით გამოსვლის საჭიროებას ვერ ხედავს ახალქალაქი–ნინოწმინდის მაჟორიტარი დეპუტატი ენზელ მკოიანი: „ჯერჯერობით არ არის ამის საჭიროება, ვაკეთებ საქმეს და არ ვლაპარაკობ“, – ამბობს ენზელ მკონიანი.

ახალქალაქი–ნინოწმინდის მაჟორიტარმა დეპუტატმა 93 სხდომიდან 31 გააცდინა, მათ შორის 11 არასაპატიო მიზეზით.

ორივე მაჟორიტარი დეპუტატი აცხადებს, რომ პლენარულ სხდომებზე არა, მაგრამ მუნიციპალიტეტებში, მოქალაქეების დახმარებისთვის აქტიურად მუშაობენ.

„თვეში 200 ადამიანს ვღებულობ და მათ პრობლემებს ვაგვარებ. ჯავახეთში არის გაზიფიცირების, სასმელი წყლის, გზის, ახალქალქში დასუფთავების პრობლემები. დეპუტატად ჩემი მოსვლის შემდეგ ადგილობრივ თვითმმართველობასთან ერთად ბევრი პრობლემა მოგვარდა“, – ამბობს ნინოწმინდა–ახალქალაქის მაჟორიტარი დეპუტატი.

მოქალაქეთა დახმარებაზე აკეთებს აქცენტს გიორგი კოპაძეც: „მაგალითად, საბარგო სადგურზე საკანალიზაცო სისტემის დაერთების საკითხი, წყალმომარაგების კომპანიასთან ჩემი აქტიურობით მოგვარდა. ასე რომ მუშაობა მიდის ჩვეულებრივ ტემპში. შეიძლება ჰიპერაქტიური არ ვარ, მაგრამ ვმუშაობ და ვაკეთებ“.

სამცხე–ჯავახეთის სამი მაჟორიტარული ოლქის დეპუტატების ბიუროები იმ ბიუროებს შორის არიან, რომლებსაც მაღალი დაფინანსება აქვთ. თითო დეპუტატის ბიუროსთვის წელიწადში 80 280 ლარია გამოყოფილი. თანხა ბიუროს თანამშრომლების ხელფასებს, ფართის ქირას და ოფისების ფუნქციონირებისთვის სხვადასხვა ხარჯს ხმარდება.

[თინათინ ზაზაძე, ახალციხე]