კოპაძეს და მკოიანს გამოსაშვები გამოცდების გაუქმების საკითხი სხვა კანონპროექტში აერია

აღნიშნულ ინფორმაციას სააგენტო on.ge ავრცელებს. გამოცემის ინფორმაციით, „ქართული ოცნების“ 36–მა დეპუტატმა ხმაური მოიმიზეზეს და დამატებითი კენჭისყრა მოითხოვეს. ხმაური პარლამენტის თავმჯდომარისთვის ირაკლი კობახიძისთვის არგუმენტი არ აღმოჩნდა და განმეორებითი კენჭისყრა არ გამართა.

გიორგი კოპაძეს და ენზელ მკოიანს „სამხრეთის კარიბჭე“ ვერ დაუკავშირდა. ენზელ მკოიანის ტელეფონს მისმა მძღოლმა უპასუხა: „დეპუტატის ტელეფონი მე მაქვს, საქმეზეა გასული, და ვერ გეტყვით როდის დაბრუნდება“. გიორგი კოპაძემ კი მოგვწერა, რომ მოგვიანებით დაგვიკავშირდება.

შეგახსენებთ, რომ გუშინ ხუთ აპრილს, საქართველოს პარლამენტმა მესამე მოსმენით ჩააგდო კანონპროექტი საგამოცდო რეფორმის შესახებ. ამ კანონით სკოლებში გამოსაშვები გამოცდები უნდა გაუქმებულიყო.

საკითხს, რომელიც განათლების სამინისტროს დაჩქარებული წესით გამოიტანა, მხარი 54-მა დეპუტატმა დაუჭირა, კანონის მისაღებად 63 დეპუტატის მხარდაჭერა იყო საჭირო.

განათლების კომიტეტის თავმჯდომარის, მარიამ ჯაშის ინფორმაციით, პარლამენტი გამოსაშვები გამოცდების გაუქმების შესახებ კანონპროექტს ხელმეორედ უახლოეს პლენარულ სხდომაზე — 16 აპრილს უყრის კენჭს.

[sknews.ge]