ენზელ მკოიანი - ‘ახალქალაქის მერია და პოლიცია ჩემზე ზეწოლას ახორციელებენ’

ახალქალაქი-ნინოწმინდის ოლქში „ქართული ოცნების“ მოქმედი დეპუტატი ენზელ მკოიანი ამბობს, რომ ადგილობრივი თვითმმართველობიდან და პოლიციიდან მის მიმართ ზეწოლა ხორციელდება.

მას შემდეგ, რაც „ქართულმა ოცნებამ“ 2020 წლის საპარლამენტო არჩევნებში მკოიანი მაჟორიტარი დეპუტატობის კანდიდატად არ დაასახელა, მან გადაწყვიტა კენჭი დამოუკიდებელ კანდიდატად იყაროს. სწორედ ამას უკავშირებს პარლამენტარი ბილბორდის გამოყენების აკრძალვას.

„გუშინწინ წარვადგინე დოკუმენტები საპარლამენტო არჩევნებში დამოუკიდებელი კანდიდატობისთვის, შეეშინდათ, რომ ამ ბილბორდზე ჩემი ბანერი იქნება განთავსებული, ამიტომაც მიკრძალავენ, ეს 10 წლის ბავშვისთვისაც გასაგებია“,- განმარტავს იგი.

მისივე მტკიცებით, ადგილობრივი თვითმმართველობისა და პოლიციის თანამშრომლები ბენზინგასამართ სადგურზე მაშინ მივიდნენ, როდესაც მკოიანები დაზიანებული ბილბორდის აღდგენით სამუშაოებს ასრულებდნენ.

„ეგ ბილბორდი 2016 წელს, ჩემი ძმის ბენზინგასამართი სადგურის ტერიტორიაზე, მისივე კუთვნილ მიწაზეა დადგმული. მაშინ ამისთვის საგზაო დეპარტამენტიდან ნებართვა აიღო, კანონიერად. 2017 წელს ჩემს ძმას მისი იჯარით გაცემა უნდოდა, მაგრამ თურქული სატვირთო მანქანა შემოვიდა ბენზინის ასაღებად სადგურზე, დაეჯახა ბილბორდს და გატეხა“, - იხსენებს მკოიანი.

მისივე მტკიცებით, დაზიანებული ბილბორდი მკოიანებმა აღადგინეს, თუმცა მის გამოყენებას ადგილობრივ თვითმმართველობაში უკრძალავენ და არც იმ დოკუმენტებს აძლევენ მარტუნ მკოიანს, რითიც დასტურდება რომ ბილბორდი ნამდვილად მას ეკუთვნის.

„არ ვიცი რატომ, ყველაფერი აირია, დოკუმენტს ითხოვენ და გვეუბნებიან, რომ ასეთი დოკუმენტი მერიაში არ იძებნება. არადა მერიაშია, უბრალოდ არ უნდათ ნახვა. ეს საკუთარი მიწაზე, საკუთარი ხარჯებით დადგმული ბილბორდია, არ შეიძლება ასეთ პატარა რამეში პოლიცია და მერია ჩაერიოს და აკრძალოს. ადამიანზე ზეწოლა სახელმწიფო რესურსებით არ შეიძლება“, - ამბობს მკოიანი „სამხრეთის კარიბჭესთან“.

ახალქალქის მერი, იური უნანიანი მკოიანის ბრალდებას უარყოფს და ამბობს, რომ მას არავინ არაფერს უკრძალავს: „ჩვენ არ აგვიკრძალავს, უბრალოდ კანონიერებას ვამოწმებთ, უკვე დგას ბილბორდი და როგორ უნდა ავუკრძალოთ?! გუშინ იყვნენ ჩვენი თანამშრომლები მანდ, შეეკითხნენ დოკუმენტაცია ჰქონდათ თუ არა, გვითხრეს, რომ აქვთ, მივეცით დრო 2-3 დღე მოიტანენ დოკუმენტებს და არანაირი პრობლემა არ იქნება“,- აცხადებს ახალქალაქის მერი.

მკოიანი კი ამბობს, რომ მისთვის ჯერ კიდევ გაურკვეველია 2020 წლის საპარლამენტო არჩევნებისთვის „ქართულმა ოცნებამ“ მაჟორიტარი დეპუტატობის კანდიდატად სამველ მანუკიანი რატომ წარადგინა: „ჩემთანაც ძალიან დიდ კითხვად რჩება ის თუ წელს ჩემს მაგივრად სამველ მანუკიანი რატომ დაასახელეს კანდიდატად. მანუკიანი თავის დროზე დეპუტატი ჩემი რეკომენდაციით გახდა“.

[რიმა სარუხანიან]