ფოფხაძე: დეპუტატების საქმიანობა სხდომებზე აქტიურობით არ უნდა ფასდებოდეს, თუმცა ესეც მნიშვნელოვანია

ასპინძა ბორჯომის მაჟორიტარი დეპუტატი გედევან ფოფხაძე პარლამენტში ადამიანის უფლებათა დაცვის სამოქალაქო ინტეგრაციის კომიტეტის პირველი მოადგილე და იურიდიული კომიტეტის წევრია, იგი, ასევე, ხელმძღვანელობს ტერიტორიული მთლიანობის აღდგენის დროებით კომისიას.

2016 წელს ფოფხაძემ პარალმენტში სიტყვით გამოსვლის უფლებით 2–ჯერ, 2017 წელს 14–ჯერ, ხოლო მიმდინარე წლის აგვისტომდე 3–ჯერ ისარგებლა.

ფოფხაძე ფიქრობს, რომ დეპუტატების საქმიანობა პარლამენტის სხდომებზე აქტიურობით არ უნდა ფასდებოდეს, თუმცა ესეც მნიშვნელოვანია.

„მაქვს პერიოდები, როცა მთელი თვის განამვლობაში სიტყვას არ ვითხოვ. ჩვენ ყველა ვმუშაობთ საკომიტეტი რეჟიმში, გვაქვს დისკუსიები, ყველა რამდენად გამოვა სიტყვით ვერ გეტყვით, რადგან უმრავლესობაში როლები გვაქვს გადანაწილებული. მე, მაგალთად, თალაკვაძეზე და მდინარაძეზე უფრო ხშირად ვერ გავალ“, – ამბობს ფოფხაძე და ამატებს, რომ საბოლოოდ პარლამენტის ღია სხდომაზე უკვე კომიტეტებში შეჯერებულ მოსაზრებებს ის დეპუტატები აჟღერებნ, რომლებსაც საჯაროობის მეტი ხარისხი აქვთ – „ ასეთი კი პარლამენტში შეიძლება იყოს 20 დეპუტატი“.

ფოფხაძე ამბობს, რომ იგი დეპუტატებთან ერთად განსაკუთრებით აქტიურად იყო ჩართული რიგი კანონების კონსტიტუციასთან ჰარმონიზაციის პროცესში: „ორგანულ კანონში შეტანილი ცვლილებების შემდეგ, უფრო ლიბერალური გახდა მოქალაქეობის მიღების წესიც. ეს კი მნიშვნელოვანი იყო იმ ქართველებისთვის, რომლებსაც საქართველოს მოქალაქეობა აქვთ დაკარგული. ბორჯომის მაგალითზე შემიძლია გითხრათ, რომ ძალიან ბვერი ადამიანი გაჭირვების გამო ციხისჯვრიდან, ტაბაწყურიდან და ბალანთიდან საბერძნეთში, რუსეთში და სომხეთში წავიდა. იქ მათ ამ ქვეყნების მოქლაქეობა მიიღეს. ჩვენი კანონის სულისკვეთება კი ის არის, რომ ეს ადამიანები ჩვენი სახელმწიფოს სამართლებრივ სივრცეში დავაბრუნოთ. აქედან გამომდინარე ამ კანონმა გაამარტივა ორმაგი მოქალაქეობის მიღების წესი“.

შეგახსენებთ, რომ სამცხე–ჯავახეთის სამი მაჟორიტარი დეპუტატიდან ორს, გიორგი კოპაძეს და ენზელ მკონიანს პარლამენტის სხდომებზე სიტყვით გამოსვლის უფლებით არ უსარგებლიათ. დეპუტატები ამბობენ, რომ ისინი კომიტეტების სხდომებზე აქტიურობენ და მუშაობენ.

[თინათინ ზაზაძე, ახალციხე]