რამდენ ლარს ხარჯავენ სამცხე–ჯავახეთში მაჟორიტარი დეპუტატების ბიუროები

მაჟორიტარული წესით არჩეული 73 დეპუტატის ბიუროების შენახვისთვის 2018 წელს გათვალიწინებული 4 397 760 ლარია. 73–დან 56 მაჟორიტარი დეპუტატისთვის 51 600 –51 600 ლარია განსაზღვრული. 14 დეპუტატისთვის, მათ შორის სამცხე–ჯავახეთიცაა, 80 280 - 80 280 ლარია გამოყოფილი. სამი ბიურო კი ისეთია, სადაც დაფინანსება 100 000 ლარზე მეტია.

მიმდინარე წელს სამცხე–ჯავახეთის სამივე მაჟორიტარულ ოლქში დეპუტატების ბიუროების ფუნქციონირებისთვის 280 840 ლარია გათვალისწინებული.
თითოეულ საარჩევნო ოლქში არსებული ბიუროსთვის კი ყოველთვიურად 4 300 ლარი გამოიყოფა. ხოლო იმ საარჩევნო ოლქში მდებარე ბიუროსთვის, რომელიც რამდენიმე მუნიციპალიტეტის ტერიტორიაზეა განთავსებული, ყოველთვიურად თითოეულ მუნიციპალიტეტზე დაფინანსება 2 390 ლარი ემატება.

თანხა ბიუროს თანამშრომელების ხელფასებს, ფართის ქირას და ოფისების ფუნქციონირებისთვის სხვადასხვა ხარჯს ხმარდება.

ახალციხე–ადიგენის მაჟორიტარ დეპუტატს გიორგი კოპაძეს ორი ბიურო ახალციხესა და ადიგენში აქვს. მას ჯამში რვა ადამიანი ჰყავს დასაქმებული. 2018 წელს ორივე ბიუროს ფუნქციონირებისთვის 80 280 ლარია განსაზღვრული.

საქართველოს პარლამენტიდან გამოთხოვილი ინფრომაციის თანახმად, გიორგი კოპაძის ბიუროს ექვსი თვის დანახარჯი ასე გამოიყურება: საწვავი 4 479 ლარი; ტრანსპორტის დაქირავება 1 950 ლარი; კომუნალური ხარჯი - 10 ლარი; წარმომადგენლობითი ხარჯი - 390 ლარი; სხვადასხვა ხარჯი - 105 ლარი. პირველი აგვისტოს მდგომარეობით თანამშრომელთა ხელფასისთვის 3 920 ლარია დახარჯული.

80 280 ლარია გამოყოფილი ნინოწმინდა–ახალქალაქში ენზელ მკოიანის ბიუროებისთვისაც, მასაც რვა თანამშრომელი ჰყვას დასაქმებული. ენზელ მკოიანის ბიურომ ექვს თვეში საწვავისთვის - 3000 ლარი, კომუნალური ხარჯებისთვის კი 694 ლარი დახარჯა. პირველი აგვისტოს მდგომარეობით თანამშრომელების სახელფასებისთვის 4 930 ლარი გაიცა.

ბორჯომი–ასპინძის მაჟორიტარმა დეპუტატმა გედევან ფოფხაძემ 2018 წელს განსაზღვრული 80 280 ლარიდან ექვს თვეში საწვავისთვის 4 487 ლარი დახარჯა, 11 თანამშრომელზე კი პირველი აგვისტოს მდგომარეობით კი 5 928 ლარის ოდენობის ხელფასი გასცა.

[თინათინ ზაზაძე, ახალციხე]