ოლქის პროკურორი - მოძალადეებთან საპროცესოს არ ვაფორმებთ

სამცხე-ჯავახეთის ოლქის პროკურორი გიორგი პაპუაშვილი იმას, თუ რა ვითარებაში სთხოვა მოსამართლე გოჩა ჯეირანაშვილმა ბორჯომის პოლიციის ყოფილ თანამშრომლებთან დაკავშირებით საპორცესოს გაფორმება, არ აკონკრეტებს.

„რა მნიშვნელობა აქვს სად იყო ეს. არასამუშაო ვითარებაში, ქუჩაში“, - გვითხრა პაპუაშვილმა.

მისი თქმით, ეს დაახლოებით ერთი თვის წინ მოხდა: „შესაძლოა გასული იყოს 20 ან 25 დღე“.

კითხვაზე, რადგან ჯეირანაშვილმა საპროცესოს გაფორმება სთხოვა, ნიშნავდა თუ არა ეს იმას, რომ ბრალდებულები მზად იყვნენ ბრალი ეღიარებინათ, გვპასუხობს, რომ არ იცის: „ვერ გეტყვით. ვუთხარი რომ ეს არ იქნება. მოძალადეებთან და ისეთ პირებთან, ვისაც ასეთ დანაშაულს სჩადის, საპროცესოს არ ვათანხმებთ. ჩვენ შორის საუბარი აღარ გაგრძელებულა. ვუთხარი, რომ ეს გამორიცხულია. მაგ თემაზე აღარ გვისაუბრია“.

„სამხრთის კარიბჭემ“ გოჩა ჯეირანაშვილთან დაკავშირება ვერ შეძლო. იგი ამ დროისთვის სასამართლოში არ იმყოფება, მისი მობილური ტელეფონიც მიუწვდომელია.

შეგახსენებთ, საქართველოს მთავარმა პროკურატურამ ახალციხის რაიონული სასამართლოს მიერ ბორჯომის პოლიციის ყოფილი უფროსისა და მასთან ერთად ბრალდებული 4 პირის გათავისუფლებასთან დაკავშირებით დღეს ბრიფინგი გამართა, რომელზეც განაცხადა, რომ განაჩენის გამოტანამდე გოჩა ჯეირანაშვილი, მისი ინიციატივით, არაოფიციალურ ვითარებაში შეხვდა გივი პაპუაშვილს და ურჩია, რომ ბრალდებულებთან გაეფორმებინა საპროცესო შეთანხმება მათი გათავისუფლების მოთხოვნით. პროკურორმა კი ამ შეთავაზებას უარით უპასუხა.

[თამუნა უჩიძე, ახალციხე]