გამოუყენებელი თავშესაფრის შენახვა მერიას წელიწადში 10 000–ლარამდე უჯდება

ახალციხეში, უსახლკაროთათვის განკუთვნილი თავშესაფარი, 2015 წლის ზაფხულში აშენდა, თუმცა დღემდე ამ შენობით არცერთ ბენეფიციარს უსარგებლია. სხვა ფუნქცია შენობას ვერც ადგილობრივმა თვითმმართველობამ გამოუნახა. როგორც ახალციხის მერიიდან მიღებულ წერილში ვკითხულობთ, ის ამ დრომდე მუნიციპალიტეტს არც სხვა მიზნებით გამოუყენებია: „შენობა თხოვების ფორმით, უსასყიდლო სარგებლობის უფლებით ააიპ „ახალციხის მუნიციპალიტეტის სათნოების სახლზეა“ გადაცემული“.

თავშესაფარს ამ დროისთვის მხოლოდ ორი დარაჯი ჰყავს. ორივეს სახელფასო სარგო თვეში 800 ლარს შეადგენს, რაც წლის განმავლობაში ჯამში 9 600 ლარია.

თავშესაფრის ასაშენებლად 120 000–მდე ლარი დაიხარჯა. 2016 წლიდან დღემდე კი ინვენტარის შესაძენად, კომუნალური ხარჯებისთვის და ხელფასების გასაცემად ჯამში ბიუჯეტიდან 54 400 ლარი გამიყო.

ახალციხის მერიაში აცხადებენ, რომ „ამ დროისთვის შენობა და ინვერნტარი იდეალურ მდგომარეობაშია“, თუმცა, შენობის გარე ფასადზე მცირე დაზიანებებია, შიგნით კი „სამხრეთის კარიბჭეს“ გადაღების უფლება არ მისცეს.

ახალციხის მერიამ აღნიშნული შენობა საცხოვრებლად მიმდინარე წლის დასაწყისში სკოლის ყოფილ შენობაში შესახლებულ ვეტერანებს შესთავაზა. სასამართლოს გადაწყვეტილებით ვეტერანებმა სკოლის შენობა უნდა დატოვონ, თუმცა, მათ იმის გამო, რომ თავშესაფარი ქალაქიდან მოშორებითაა, მერის შეთავაზებაზე უარი თქვეს.

ახლა კი ახალციხის მერიაში აცხადებენ, რომ „დღეისთვის თავშესაფრის დანიშნულებასთან დაკავშირებით მუნიციპალიტეტის მხრიდან რაიმე სახის ცვლილება არ იგეგმება“.

გასულ წელს უფუნქციოდ დარჩენილი თავშესაფარი აუდიტის დასკვნაში მოხვდა. მაშინ აუდიტის სამსახურში ამბობდნენ, რომ „მუნიციპალიტეტმა, სოციალურად დაუცველთათვის სახლის მოსაწყობად, 134.4 ათასი ლარი არაეფექტიანად დახარჯა“.



[ლუბა გიორგაძე, ახალციხე]