უნივერსიტეტის რექტორი - წინასაარჩევნო პერიოდში ბევრი ტალახი მესროლეს

რექტორის არჩევნები სამცხე-ჯავახეთის სახელმწიფო სასწავლო უნივერსიტეტში 13:00 საათზე დაიწყო. საარჩევნო კომისია სამი წევრისგან შედგებოდა. არჩევნებზე აკადემიური საბჭოს რვავე წევრი გამოცხადდა. რექტორად მერაბ ბერიძე აირჩიეს.

საბჭოს შემადგენლობაში თინა იველაშვილი, ქეთინო გრძელიშვილი, ლავრენტი ჩიბურდანიძე, ჯემალ მამიაშვილი, ლერი ნოზაძე, რევაზ ჭიღლაძე, მალხაზ ლომსაძე და დავით ხობელია იყვნენ.



შედეგების გამოცხადების შემდეგ დამარცხებულმა გურამ კუტალაძემ კომენტარი არ გააკეთა.

„ამაზე რა კომენტარი უნდა გავაკეთო?!“- განუცხადა მან „სამხრეთის კარიბჭეს“.


მერაბ ბერიძემ კი განაცხადა, რომ მოგების იმედი ჰქონდა: „წინასაარჩევნო პერიოდი საკმაოდ რთული იყო. ბევრი ტალახი მესროლეს. ურთიერთობის ასეთ ფორმას მიჩვეული არ ვარ, ძალიან უხერხული იყო ჩემთვის“
.


შეგახსენებთ, არჩევნებში მონაწილე რვა ადმიანიდან ექვსმა მერაბ ბერიძის კანდდატურას დაუჭირა მხარი, ერთმა გურამ კუტალაძეს, ერთი ბიულეტენი კი ბათილად ჩაითვალა.

დაანონსებული აქციის მიუხედავად, ახალციხეში დღეს არ ჩამოსულა და არც აქცია გაუმართავს გიგლა გობეჩიას. შეგახსენებთ, რომ სამცხე-ჯავახეთის უნივერსიტეტის ყოფილი ლექტორი გიგლა გობეჩია რექტორის არჩევნების დღეს უნივერსიტეტთან მერაბ ბერიძის წინააღმდეგ საპროტესტო აქციის გამართვას აპირებდა. მან მერაბ ბერიძის შესახებ გაზეთ „ვერსიაში“ სტატიებიც გამოაქვეყნა. მასალაში, სახელწოდებით „სახელმწიფო ძვალი სვავი რექტორისთვის“, გობეჩია მერაბ ბერიძეს კორუფციაში ადანაშაულებდა. „სამცხე-ჯავახეთის უნივერსიტეტში მერაბ ბერიძისნაირი ადამიანების ადგილი არ არის. დამიჯდეს პირდაპირ ეთერში და მე მას ფაქტებს დავუდებ“ - აცხადებდა გობეჩია.

„აქციის ორგანიზებისთვის დრო არ მეყო', - განუცხადა "სამხრეთის კარიბჭეს" გიგლა გობეჩიამ.

[ნინო ზედგინიძე, ახალციხე]