15 მაისიდან სჯსუ–ს რექტორის არჩევნებში მონაწილე კანდიდატთა რეგისტრაცია იწყება

სსიპ სამცხე-ჯავახეთის სახელმწიფო უნივერსიტეტის აკადემიური საბჭოს 2017 წლის 12 აპრილის N6 დადგენილების თანახმად, არჩევნებში მონაწილე კანდიდატთა რეგისტრაცია 15 მაისიდან 29 მაისის ჩათვლით იწარმოებს. არჩევნები კი 3 ივლისს ჩატარდება.

ამავე დადგენილების მიხედვით, რექტორობის კანდიდატი შეიძლება იყოს პირი, რომელსაც აქვს დოქტორის ან მასთან გათანაბრებული აკადემიური ხარისხი და უმაღლეს საგანმანათლებლო დაწესებულებაში ადმინისტრაციულ, სასწავლო და სამეცნიერო სფეროში მუშაობის გამოცდილება.

რექტორის არჩევნებში მონაწილე კანდიდატმა უნდა წარადგინოს:

ა) განცხადება - სსიპ სამცხე-ჯავახეთის სახელმწიფო უნივერსიტეტის საარჩევნო კომისიის სახელზე დადგენილი ფორმის შესაბამისად;
ბ) ავტობიოგრაფია (CV) დადგენილი ფორმის შესაბამისად;
გ) პირადობის დამადასტურებელი დოკუმენტის ასლი;
დ) დოქტორის ან მასთან გათანაბრებული აკადემიური ხარისხის სანოტარო წესით დამოწმებული ასლი (უცხოენოვანი დოკუმენტის შემთხვევაში სანოტარო წესით დამოწმებული ქართულენოვანი თარგმანი);
ე) შრომითი გამოცდილების ამსახველი დოკუმენტი (დედანი ან/და სანოტარო წესით დამოწმებული
ასლი);
ვ) სამოქმედო გეგმა.

რექტორს ირჩევს აკადემიური საბჭო ფარული კენჭისყრით, სიითი შემადგენლობის უმრავლესობით, ოთხი წლის ვადით.

შეგახსენებთ, ამჟამად უნივერსიტეტის რექტორია მერაბ ბერიძე. იგი რექტორად 2013 წლის 3 ივლისს, 6 ხმით ერთის წინააღმდეგ, აირჩიეს. მაში არჩევნებში ორი კანდიდატი მონაწილეობდა: მერაბ ბერიძე და გურამ კუტალაძე. არჩევნებში მონაწილე რვა ადმიანიდან ექვსმა მერაბ ბერიძის კანდდატურას დაუჭირა მხარი, ერთმა გურამ კუტალაძეს, ერთი ბიულეტენი კი ბათილად ჩაითვალა.

[sknews.ge]