შესაძლოა რექტორის არჩევნები საპროტესტო აქციის ფონზე გაიმართოს

„სამცხე-ჯავახეთის უნივერსიტეტში მერაბ ბერიძისნაირი ადამიანების ადგილი არ არის. დამიჯდეს პირდაპირ ეთერში და მე მას ფაქტებს დავუდებ“,- აცხადებს სამცხე-ჯავახეთის სახელმწიფო სასწავლო უნივერსიტეტის ყოფილი ლექტორი გიგლა გობეჩია.

მან უნივერსიტეტის რექტორის მოვალეობის შემსრულებელზე მერაბ ბერიძეზე გაზეთ „ვერსიის“ დღევანდელ ნომერში სტატია სათაურით „სახელმწიფო ძვალი სვავი რექტორისთვის“ გამოაქვეყნა. აქ ავტორი კონკრეტულ ფაქტებზე საუბრობს და ამბობს, რომ ეს მხოლოდ დასაწყისია.

„უამრავი მამხილებელი ფაქტი მაქვს ამ ადამიანზე. 15 წლის მანძილზე მისი მოღვაწეობა სამარცხვინო იყო და მის ავ საქმეებს ნათელს მოვფენ“ ,- აცხადებს გობეჩია.

იგი უახლოეს მომავალში მედიაორგანიზაციის ჩამოყალიბებას აპირებს, რომელიც ჟურნალისტური გამოძიებების მონიტორინგს განახორციელებს: „მე უკვე ვესაუბრე რამდენიმე მედიასაშუალების დირექტორს და ისინი თანახმა არიან მსგავს ორგანიზაციაში გაწევრიანდნენ. ამ ეტაპზე ორგანიზაცია ფორმირების პროცესშია. ეს მედიაორგანიზაცია პირველ რიგში მერაბ ბერიძის შავბნელ საქმეებს გამოიძიებს“.

გობეჩია ამბობს, რომ დიდი სურვილი აქვს მერაბ ბერიძეს პირდაპირ ეთერში დაუჯდეს. „მე მოვითხოვ, დამიჯდეს პირდაპირ ეთერში,თუმცა ვერ ბედავს“.

გობეჩია, ამბობს, რომ შესაძლოა 3 ივნისს ახალციხეში ჩამოვიდეს და აქცია მოაწყოს: „არ ვიცი, რამდენად მოვახერხებ, სურვილი დიდი მაქვს. მე მას უნივერსიტეტში გრიგოლ ხანძთელის ძეგლთან გავუმართავ ბრიფინგს“.

შეგახსენებთ, დაპირისპირება მერაბ ბერიძესა და გიგლა გობეჩიას შორის მას შემდეგ გამწვავდა, რაც გიგლა გობეჩიას პროფესორ-მასწავლებელთა კონკურსზე არ გამოცხადების გამო ლექტორის სტატუსი შეუჩერდა.

[ ნინო ზედგინიძე, ახალციხე]