სამცხე–ჯავახეთში სახელმწიფო პროგრამების შესახებ საინფორმაციო კამპანია იწყება

ეთნიკური უმცირესობებისათვის, სახელმწიფო სერვისების ინფორმირებულობის მიზნით დაწყებული საინფორმაციო კამპანია დღეს, 27 ივლისს შერიგებისა და სამოქალაქო თანასწორობის საკითხებში საქართველოს სახელმწიფო მინისტრმა ქეთევან ციხელაშვილმა ახალქლაქში გახსნა.

მინისტრის თქმით, საინფორმაციო კამპანია სამოქალაქო თანასწორობისა და ინტეგრაციის სახელმწიფო სტრატეგიის ფარგლებში დაიგეგმა.

„რეგიონში მცხოვრები ეთნიკური უმცირესობების წარმომადგენლების ინფორმირება და ინფორმაციის ხელმისაწვდომობის გაუმჯობესება, სახელმწიფოში არსებული სხვადასხვა პროგრამებისა და სერვისების შესახებ ცნობიერების ამაღლება - ეს არის საქართველოს მთავრობის ხედვა და სახელმწიფო პოლიტიკის ერთ-ერთი მთავარი პრიორიტეტი. შესაბამისად, ჩვენ ვგეგმავთ, რომ კამპანიის ფარგლებში მუნიციპალურ დონეზე, ეთნიკური უმცირესობების წარმომადგენლებით დასახლებულ პუნქტებსა თუ სოფლებში, თითოეულ ადამიანამდე მივიტანოთ ინფორმაცია“,– განაცხადა ქეთევან ციხელაშვილმა.

შერგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის ინიცირებით და კოორდინირებით საინფორმაციო კამპანია უკვე ჩატარდა ქვემო ქართლის და კახეთის რეგიონებში. სამცხე-ჯავახეთის რეგიონში მოსახლეობასთან საინფორმაციო შეხვედრები ჯანდაცვის, ეკონომიკის, ფინანსთა და გარემოს დაცვისა და სოფლის მეურნეობის სამინისტროების ჩართულობით, ქართულ და სომხურ ენაზე ჩატარდება.



[ლუბა გიორგაძე, ახალქლაქი]