სტაჟირების პროგრამა ეთნიკური უმცირესობების წარმომადგენელი ახალგაზრდებისთვის

ინიციატივა: საჯარო დაწესებულებებში სტაჟირების პროგრამა „1+4“ პროგრამის მონაწილე სტუდენტებისა და კურსდამთავრებულთათვის პირველად ხორციელდება. პროგრამის ინიციატორი შერიგებისა და სამოქალაქო თანასწორობის საკითხებში სახელმწიფო მინისტრის აპარატია. საპილოტე პროგრამა საქართველოს გაერო-ს ასოციაციასთან თანამშრომლობით იწყება.

„ჩვენთვის პრიორიტეტულია ნიჭიერი ახალგაზრდები, რომლებიც დღეს ამ დარბაზში იყვნენ შეკრებილი, ჩვენთვის მნიშვნელოვანია, რომ მათ საკუთარ სამშობლოში, საქართველოში შეძლონ საკუთარი თავის რეალიზება“, – განაცხადა საქართველოს სახელმწიფო მინისტრმა შერიგებისა და სამოქალაქო თანასწორობის საკითხებში ქეთევან ციხელაშვილმა.

უწყების ცნობით, სტაჟირების საპილოტე პროგრამის მიზანია საქართველოში მცხოვრები ეთნიკური უმცირესობების წარმომადგენლების დასაქმების პერსპექტივის გაუმჯობესება და საბოლოო ჯამში, მათი ჩართულობისა და სამოქალაქო ინტეგრაციის პროცესის ხელშეწყობა.

პროგრამის ფარგლებში, ეთნიკური უმცირესობების წარმომადგენლებს შესაძლებლობა ექნებათ კონკურსის საფუძველზე ჩაერთონ სტაჟირების პროცესში. სპეციალურად შექმნილი კომისია უზრუნველყოფს სტაჟიორების შერჩევას შეფასების დადგენილი კრიტერიუმებით. წარმატებული აპლიკანტები სამ თვიან სტაჟირებას გაივლიან სახელმწიფო უწყებებში, ადგილობრივი თვითმმართველობის ორგანოებსა და საჯარო სამართლის იურიდიულ პირებში.

სტაჟირების პროგრამისთვის რეგისტრაცია შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის ოფიციალურ ვებგვერდზე smr.gov.ge, 23 მარტს დაიწყო და 10 აპრილამდე გაგრძელდება.

[sknews.ge]