სახელმწიფო მინისტრი ქეთევან ციხელაშვილი ჯავახეთში მოსახლეობას შეხვდება

დღეს, 27 ივლისს, სახელმწიფო მინისტრი ჯავახეთში ვიზიტს ქალაქ ნინოწმინდიდან დაიწყებს. იგი 13:00 საათზე სომეხთა სამოციქულო ეკლესიის საქართველოს ეპარქიის, სურბ სარქისის ეკლესიის მღვდელ-მსახურებსა და მრევლს შეხვდება.

მინისტრი შეხვედრაზე ახალი ინიციატივის შესახებ ისაუბრებს, რომლის მიხედვითაც, სახელმწიფო მინისტრის აპარატის ინიციატივითა და ზურაბ ჟვანიას სახელობის სახელმწიფო ადმინისტრირების სკოლის მხარდაჭერით, სექტემბერში ადგილობრივი სასულიერო პირებისა და მრევლისთვის ქართული ენის შემსწავლელი სპეციალური კურსები გაიხსნება.

14:30 საათზე შეხვედრა მინისტრის ვიზიტი ახალქალაქში გაგრძელდება. ქეთევან ციხელაშვილი სამცხე-ჯავახეთის რეგიონში სამოქალაქო თანასწორობისა და ინტეგრაციის სახელმწიფო სტრატეგიის ფარგლებში დაგეგმილ საინფორმაციო კამპანიას გახსნის.
კამპანია სახელმწიფო პროგრამებისა და სერვისების შესახებ, სამცხე-ჯავახეთში მცხოვრები ეთნიკური უმცირესობების წარმომადგენლების ინფორმირებას გულისხმობს.

მომდევნო კვირის განმავლობაში, მოსახლეობას მიეწოდება ინფორმაცია ჯანდაცვის, სოფლის მეურნეობის, სოციალური თუ ეკონომიკური პროგრამის შესახებ.

ჯავახეთში დაგეგმილ შეხვედრებს დაესწრებიან შრომის, ჯანმრთელობისა და სოციალური დაცვის, სოფლის მეურნეობის და გარემოს დაცვის მინისტრის მოადგილეები, საქართველოს პარლამენტის წევრები, სხვადასხვა სახელმწიფო სტრუქტურებისა და ადგილობრივი ხელისუფლების წარმომადგენლები.

[sknews.ge]